unnerluussinerit
Giiti Tittussen: Pakatsinaqaaq
Unnerluutiginnittut pakatsisorujussuupput Aleqa Hammondimut, Kuupik Kleistimut Steen Lyngemullu unnerluussutitik politiit ingerlateqqikkumanngimmatigit
Siumumit folketingimut ilaasortanngoqqammersup Aleqa Hammondip tallimanngormat Facebookimi quppernermini nuannaarutigalugu oqaluttuarigaa ullumi inissiamut Christiansborgip eqqannguaniittumut nuussalluni, innuttaasut Giiti Tittussen, Lara Olsen, Nuka Silas Nathanielsen aamma Jan Joe Siedsen pakatseqqapput.
Tamatumunnga pissutaavoq Kalaallit Nunaanni Politiit pingasunngormat nalunaarmata politiit naliliisut innuttaasut sisamat juunip 10-anni politiinut unnerluussutaasa ingerlateqqinnissaannut tunngavissaqanngitsoq, unnerluutiginnittut isumaqarmata Aleqa Hammond, Kuupik Kleist aamma Steen Lynge peqquserluuteqarsimasut allallu piinik atornerluisimasut.
Unnerluutiginnittut ugguarput
Unnerluussisussaatitat pingaartumik pingaartissimavaat politikerinut pingasunut - Kuupik Kleist maanna politikeriujunnaarnikuuvoq - unnerluussutit misissoreerlugit ´pinerluttoqarsimaneranut pisariaqartumik pasilliutissaqanngitsoq´.
Naliliineq tamanna Giiti Tittussenip uggornartippaa.
– Pakatsinartorujussuuvoq. Tusagassiorfinnulli nalunaarutaanni (Kukkunersiuinermik ingerlatsiviup Deloitte-p kukkunersiuinermi nalunaarusiaa, aaqqiss.) atuarneqarsinnaavoq namminersorlutik oqartussat inunnit pineqartunit taartissaqarfigineqartut. Uagullu innuttaasut qanoq iliuuseqarsinnaanngilagut pissutigalugu ingerlatsiviup inuinnaallu akornanni akiligassaammata, Giiti Tittussen KNR-mut oqarpoq.
– Ersarittorujussuuvoq taakkua (namminersorlutik oqartussat, aaqqiss.) qisuariarsimasussaagaluartut. Tamannalu pissutigalugu maanna ilimanarsivoq landskarsip aningaasaataanik atornerluisimaneq kinguneqartikkusunngikkaat, taanna Radioaviisimut itisiliivoq.
Kleistip Lyngellu qisuariaataat
Siumumeersoq Aleqa Hammond, Atassummeersoq Steen Lynge aamma Inuit Ataqatigiinni politikeriusimasoq Kuupik Kleist naluneqanngitsutut landskarsimut akiligassaqarsimapput - politikerit namminerluinnaq aningaasartuutigisimasaminnik.
Kuupik Kleist imminut unnerluussummik politiit ingerlatitseqqinnginniarnerannut oqaaseqaatitut KNR-mut imatut oqarpoq:
– Politimstereqarfik isumaqarsimammat pinerluttoqarsimanngitsoq tamanna tusaatissatut tigusariaqarpoq. Uannut atatillugu kissaatiginartissinnaagaluarpara qanoq pisoqarpiarsimaneranik annertunerusumik qulaajaasoqarnissaa. Tassami sorpassuaqarpoq suli paasisimanngisannik.
Steen Lynge pisimasoq pillugu apersorneqarumanngilaq, Facebook-imili quppernini innersuussutigalugu, tassani allalluni politiit isumaqatigalugit. Namminerminullu unnerluutiginnissut ´tunngavissaqarsimanngitsoq´.
Hammond suli nipaqanngilaq
Aleqa Hammond siusinnerusutulli Sermitsiaq.AG-mit apersorneqarumanngilaq, soorlu 2014-imi upernaakkut aamma taamaassimasoq, taamanikkut naggataatigut ima tatineqartigilerami, Siumumit siulittaasutut tunuarluni, aqaguanilu Inatsisartunut qinersinissaq nalunaarutigineqarpoq.