Ataatsimiinneq

GIF tamanut timersornermik pilersitsiniarpoq

Nunatsinni Timersoqatigiit Kattuffiata timersorneq pillugu ataatsimeersuarnerit annersarigallagaat sapaatip-akunnerani kingullermi iluatsilluarlugu ingerlappaa

Kalaallit Nunaanni Timersoqatigiit Kattuffiat sapaatip-akunnerani kingullermi iluatsilluartumik ataatsimeersuartitsivoq

Timersorneq pillugu ataatsimeersuarneq sapaatip-akunnerani kingullermi pivoq, tassani pingaarnertut timersornerup siunissaa sammineqarpoq.

Tassanilu 130-t sinnerlugit peqataapput 30-llu tapersiillutik saqqummiinnerminni siuarsaataasussanik, timersorfinnik sanaartornermut tunngasunik, timersornerup ineriartorneranut, aaqqissuussanik ineriartortitsinernik nutaannillu pilersitsinernut tunngasunik isummersorlutillu isumassarsiaqarput.

Kalaallit Nunaanni Timersoqatigiit Kattuffiat ataatsimeersuartitsisuuvoq.

Atuaruk: Ataatsimeersuarneq: Timersorneq qaffassarneqassaaq

Pisariaqartoq
Timersorneq kikkunnut tamanut tulluarsinnaavoq, taannalu piviusunngortinniarlugu ataatsimeersuarnermi saqqummiissunit pisariaqartoq angusassatut toraagaralugu sulissutigisassaasoq erserpoq.

- Kikkunnut tamanut timersorneq tamanut timersorneruvoq – unamminertut pinnguarnertulluunniit – ataatsimoortitsisuuvoq, ataatsimeersuarnerullu nalaani timersornermut tunngasunik saqqummiussinerni oqallinnernillu assigiinngitsutigut ersertarluni, kattuffik tusagassiuutinut nalunaarummi allappoq.

- Timersornermi aqqutigalugu – sualummik ileriikkaarluni timersornermi – ataatsimoornikkut ataqatigiisitsilertarpoq attaveqaatinillu nutaanik pilersitsisarluni, ajunngitsorpassuarnillu ataatsimoornernik misigisaqartitsisarluni – taakku taaneqartut nuannaarnermik inuunermilu naleqalersitsisuupput. Allatut nassuiarlugu sianissutsikkut peqqinneq timersornermut tunniusseqataassuuvoq.

Atuaruk: Nunarput amerlanerusunik pikkorivissunik timersortartoqalissaaq

Tamanut timersorneq
Ataatsimeersuarnermi arlaleriaq erserpoq, timersorneq inunnut naapittarfiusoq inunnullu ataasiakkaanut nakussassaataasussatut ataatsimuulersitsisussatullu naatsorsuussaasoq, timersortartutut pitsanngorsaasuussasoq ajunngitsorpassuarnillu misigisaqarfiussasoq – taakkulu piviusunngussappata timersornerup silarsuaani suleqatigiittariaqarpoq.

- Ataatsimeersuarneq isumassarsiuffiilluartoq ukiullu aggersussanut assigiinngitsunik suliassaqalersitsisoq, Kalaallit Nunaanni Timersoqatigiit Kattuffiata siulittaasua Nuka Kleemannip oqarpoq.

Kalaallit Nunaanni Timersoqatigiit Kattuffiata ataatsimeersuartitsinerani Kalaallit Nunaanni timersornerup siunissaani ilisimasanik nutaannik misilittakkanillu pissarsivoq, taakkulu tunaartaralugit siumut isigisumik kikkunnut tamanut timersornermut pilersaarusiornermi atorluarneqarsinnaasunik.

Pingaaruteqarporlu Kalaallit Nunaanni timersornerup siunissaanut sullissisut ineriartorfiusumik nukittunerusumillu aallunneqarnissaat, kikkut tamarmik periarfissaqarlutik peqataaffigisinnaasaannik.

Powered by Labrador CMS