GIF
GIF-mi siulittaasoq unammilleraa
Kalaallit Nunaanni Timersoqatigiit Kattuffianni ukiumoortumik sinniisut aallartitat ataatsimiinneranni siulittaasumut qinersisoqassaaq
GIF-mi maanna siulittaasoq, Nuka Kleemann, siulittaasutut qinigassanngorteqqippoq taannalu Sisorartartut Kattuffianni siulittaasumit, Timooq Mølgaardimit unammillerneqarpoq.
Kalaallit Nunaanni Timersoqatigiit Kattuffianni ukiumoortumik sinniisut aallartitat ataatsimiinnerannut atatillugu qinersisoqassaaq, tamanna arfininngorpat Nuummi Hotel Hans Egedimi pissaaq.
Iliuusissatut siunniussat nutaat
Qinersinissat saniatigut iliuusissatut siunniussat nutaat, malittarisassat nutartikkat akuersissutigineqarnissaat ilaatinneqarput, aammalu kattuffinnit ataasiakkaanit innersuussutit. Kalaallit Nunaanni Timersoqatigiit Kattuffiat tallimanik siulersuisoqarpoq, sinniisullu aallartitat ataatsimiinneranni taasisinnaasut 32-iussallutik.
Siulittaasussamut qinersinerup saniatigut siulersuisut marluk qinerneqartussaapput, tassanilu John Thorsen aammalu Bolethe Stenskov inaat taasissutigineqartussaallutik. John Thorsen Bolethe Stenskovilu tamarmik qinigassanngorteqqipput, tamatumalu saniatigut Aalipaaraq Kreutzmann, Kalaallit Nunaanni Volleyball-ertartut Kattuffianiit qinigassanngortilluni.
Saqqummiussineq
Kattuffiup Idrættens Analyseinstitut suleqatigalugu iliuusissaq nutaaq Timersoqatigiillu Kattuffiata 2014-miit misissueqqissaartitsinerata inernera saqqummiutissavaat. Tamanna Katuap inersuaaraanni pissaaq.