GIF: Island Gamesimi medaalia ataaseq naammanngilaq

Medaalia kuulti ataaseq.

Tassa Kalaallit Nunaata Island Games 2015-imi Jerseymi medaaliannattatuaat. Angusaq Kalaallit Nunaanni Timersoqatigiit Kattuffianni generalsekretærip, Carsten Olsenip, naammagivallaanngilaa.

- Kuultinnannermik naggasiineq nuannerpoq. Badmintonertartut Jens-Frederik aamma Bror Madsen takutitsilluaqaat. Kisianni ataasiinnarmik Island Gamesimi medaaliannanneq naammanngilaq, taamaammat naammagisimaaginnarsinnaanngilarput, Carsten Olsen Sermitsiaq.AG-mut oqarpoq.

Timersortartut arlallit pitsanngortariaqarput
Kalaallit Nunaat kingullermik 2013-mi Island Gamesimut Bermudami peqataagami sisamanik madaaliannappoq - kuulti ataaseq, sølvit marluk, bronze medaaliarlu ataaseq. Aamma taamanikkut GIF-imit naammagineqanngilaq.

- Ineriartortitseqqinnissaq pisariaqarpoq. Uagut (Kalaallit Nunaanni Timersoqatigiit Kattuffianni, red.) kattuffinnut qaninnermik attaveqateqartariaqarpugut. Peqataanissamut piumasaqaatit qimerloortariaqarpagut. Unammiuaarnissanut annerusunut piareersarnernut. Pitsaanerpaanut ilaassagutta pisariaqarpoq, timersortartut timimikkut sungiusarluarnissaat, qasujaallisarnissaat aamma eqqarsartaatsikkut piareersarnissaat pisariaqarpoq.

Carsten Olsen erseqqissaavoq, nangillunilu:

- Ineriartorluarnissamut periarfissat takusinnaavagut. Kisianni timersortartut 60-70 procentit akornanniittut pitsanngoriarnissartik pisariaqartivissorpaat. Nunanut allanut unammisartuuneq inooriaasaavoq, unamminissap tullianut piareersalereerneq unammineq kingulleq naaniariartoq aallartittappoq. Unamminissat tullianut piffissaq sivisugaluarpalluunniit.

GIF-imi generalsekretærip kalaallit peqataasut tamarmik timersorusussusermik aamma unammerusussusermik unammiuaarnerni takutitsinerat nuannaarutigaa.

- Aamma eqqaamasariaqarparput Jerseymi unammisani peqataasut Bermudami peqataasunit nukittunerujussuunerat, Carsten Olsen oqarpoq.

Angutit arsaattartut nersualaarpai
Naak angutit arsaattartut unamminermi tallimaallutik inissikkaluartut, Bermudamiinnermit Carsten Olsen naapertorlugu pitsanngoriarsimapput.

- Puljeminnit ingerlaqqingajakkaluarput. Ajoqaaq ingerlaqqinnginnamik, ingerlariaqqinnissamut piukkunnaraluarput. Peqataanissaminnut assut sungiusarluarput, angusaminnut nersualaangaatsiagassaapput pitsanngoriarnikooqigamik, GIF-imi generalsekretæri oqarpoq.

Kalaallit Nunaat 19-inngortoq 24-usunit
Qeqertanit 24-usunit Island Gamesimut 2015-inimi peqaataasunit, kalaallit kuultinnattaavat peqataasut inernerit tamarmik katinnerini Kalaallit Nunaat 19-itut inissitsippaa.

Sanilliullugu savalimmiut 60-inik medaaliannapput - kuultit 18-it, sølvit 18-it, bronzit 24-t.
Jersey medaaliannannerpaavoq 50-inik kuultinnalluni, 54-inik sølvinnalluni, 29-nillu bronzinnalluni.

2013-mi Island Gamesertoqarnerani Bermudami Kalaallit Nunaat normu 17-itut 22-iusunit inissippoq. Tamanna ataatsimik kuultinnakkatta, marlunnik sølvinnakkatta aamma ataatsimik bronzinnakkatta pivoq.

2011-mi Isle of Wightimi Kalaallit Nunaat 19-itut inissippoq 24-usunit. Tamanna ataatsimik sølvinnakkatta aamma bronzinnakkatta pivoq.

2009-mi Island Gamesertoqarnerani arfineq-pingasunik medaaliannattoqarpoq - kuulti ataaseq, sølvit sisamat, bronzillu sisamat. Taamani Island Games Ålandimi ingerlanneqarpoq.

Tullissaani ukiut marluk qaangiuppata Island Gamesertoqalerpat Gotlandimi ingerlanneqassaaq.

Allaaserisat Island Gamesimut tunngasut tamaasa uani atuakkit