inatsit

GIF-ip inatsisissatut siunnersuut ilassilluarpaa

Politikerit timersorneq pimoorummassuk Timersoqatigiit Kattuffiata siulittaasuata Nuka Kleemannip qiimmatsaatigaa

– Politikerit timersorneq pimoorutilermassuk pingaarnertut nuannaarutigeqaarput. Pingaarnersiuinitsinnut inatsisitigut maanna illersugaasinnaalerpugut, Timersoqatigiit Kattuffianni siulittaasoq Nuka Kleemann oqarpoq

Inatsisartut upernaakkut ataatsimiinneranni, tallimanngornermi apriilip 8-anni aallartittumi, timersorneq timigissarnerlu pillugit inatsisissatut siunnersuut oqaluuserineqartut siulliit ilagaat.

Tamatumani pingaarnertut anguniagaalluni timersornerup pisortanit akisussaaffigineqartutut erseqqarinnerusumik inissisimalernissaa aamma pisortat timersoqatigiiffiillu akisussaaffiisa ersarissarneqarnissaat.

Atuaruk: Ataatsimeersuarneq: Timersorneq qaffassarneqassaaq

Inatsit immikkoortoq
Politikerit timersornermik pingaartitsinerat immikkullu inatsisiliuussiniarnerat Timersoqatigiit Kattuffiannit (GIF-imit) nuannaarutigineqarpoq, timersornermummi inatsit Inatsisartut peqqussutaanni kulturimut sunngiffimmullu tunngasunik suliaqarnermut atatinneqaraluarmat.

Timersoqatigiit Kattuffianni siulittaasoq Nuka Kleemann neriulluarpoq.

- Timersornerup immikkut inatsisiliuunneqarnissaa aallarnisarneqarmalli GIF-imit malinnaatinneqarpugut. Politikerit timersorneq aamma pimoorummassuk pingaarnertut nuannaarutigeqaarput. Pingaarnersiuinitsinnut inatsisitigut maanna illersugaasinnaalissaagut.

Atuaruk: Sponsorimik isumaqatigiissut kajumissutsiminnik ikiuuttartunik amerlanernik pilersitsissaaq

Oqiliallaataassasoq
- Soorlu namminneq kajumissutsiminnik suliaqartut siunissami inatsisitigut illersugaalissapput. Pisortat imaluunniit namminersortut timersortarfiutaasa nutarterneqarnissaat imaluunniit aserfallatsaalineqarnissaat pisortanit tapiiffigineqarsinnaalissapput tamannalu isumalluarnartorujussuuvoq, Nuka Kleemann oqarpoq.

Timersornermik suliaqartut suliassanik assigiinngitsunik sulinerminni inatsimmik tunuliaqutissaqalersussaanerat aamma oqilisaataassaaq, suliassammi ilarpassui aalajangiisussanut assigiinngitsunut ingerlateqqinneqaannartarmata.

Atuaruk: Kalaallit Nunaanni Timersoqatigiit Kattuffiata nunarput ataatsimoortinniarpaa

Allaaserisaq tamaat Sermitsiami saqqummertumi kingullermi atuaruk. Aviisi aamma uani pisiarisinnaavat:

Powered by Labrador CMS