GHF: Aaqqissuussat annertuut ikioqatigiiffiunerusariaqarput
Kalaallit Nunaata assammik arsarnermi Pan Am-imik aaqqissuussineranut atatillugu Kalaallit Nunaanni Timersortartut Kattuffiat suleqataanerusimasinnaagaluartoq assammik arsartartut kattuffiani siulittaasoq isumaqarpoq
- Pan Am-ip aaqqissuunneranut kisimiittutut misigisimavugut. Kalaallit Nunaanni Timersortartut Kattuffiata (GIF) suleqataanerunissaa neriuutigisimagaluarparput.
Assammik arsarsartartut kattuffianni siulittaasoq Jørgen Isak Olsen Sermitsiaq.AG-mut oqarpoq.
- GIF-imit aningaasanik tapiiffigitippugut, kisianni ingerlatsinermut atatillugu kisimiippallaartutut misigisimavugut. Siulersuinikkut kaammattuinermut atatillugu tusagaqanngilagut, isumaqarpunga taamaattut piusariaqaraluartut, GHF-imi siulittaasoq oqarpoq.
Taamaattumik iliuuseqartoqarnissaa neriuutigaa.
- Timersoqatigiiffiit kattuffiannut allagaqarpunga qanoq iliornissamut pilersaaruteqarnersut, aamma kattuffittut ajutuussagaluarutta kattuffittut nammineq nammassanerigut. Annerusumik taanna pillugu annerusumik tusarlerneqanngilagut, Jørgen Isak Olsen oqarpoq.
Taamatut aaqqissuussissagaanni kattuffiit suleqatigiiffiunerusariaqartut isumaqarpoq.
- Ataqatigiiffigineqarnerusariaqarput allamillu aaqqissuusseqqittoqartariaqartoq isumaqarpunga. Sulinermut aqqutissanik pilersitsisoqartariaqarpoq, taamaasilluni siunissami timersornikkut aaqqissuussinerit pitsaanerusumik ingerlanneqarsinnaaniassammata, Jørgen Isak Olsen oqarpoq.
Pan Am-ertoqarneranut atatillugu bilitsit 14.000-it tunineqarnissaat kattuffimmit naatsorsuutigineqarpoq.