assammik arsarnermi GM
GHF: Taamaammat U-18-it Sisimiuni GM-issapput
Timersoqatigiiffiit amerlanngitsut Paamiuni GM-imut nalunaarsimanerat pissutigalugu U18-GM Sisimiunut nuunneqarpoq
Timersoqatigiiffik Nagtoralik-45 ukiuni 70-nngortorsiorneranut atatillugu assammik arsarnermi U18-it GM-ernerat ingerlattussaagaluaraat Sermitsiaq.AG-mi pingasunngormat allaaserineqarpoq. Kisianni Assammik arsartartut kattuffiat Nagtoralimmut nalunaarutigineqarpoq GM Sisimiunut nuunneqartoq
Nagtoralik-45-mi siulersuisut taamatut aalajangertoqarnera iluarinngilaat.
- Piareersarnerit sukumiisut maani Paamiuni ingerlatilereernikuugaluarpagut, Nagtoralimmi assammik arsartartut immikkoortortaani siulittaasoq Hermann Møller tusagassiuutinut nalunaaruteqarpoq.
Peqataasussat ikippallaartut
Timersoqatigiiffiit sisamaannaat nukappissat unammersuarnissamut nalunaarsimasut GHF-imit nalunaarutigineqarpoq.
- Unammersuarnissamullu atugassaritassat atuutissappata iligiit arlaat peqataannginnissaminik nalunaaruteqarsinnaanera ernumanartinneqarsinnaavoq, taamaattumillu GIF-ip iligiit amerlassusaatut minnerpaaffiliunneqartoq ataanneqarpat pissartanngorniunneq pisortatigoortuujunnaartussaassaaq, taamaalippallu peqataasussat pisortatigoortuunngitsumut peqataanissaminnut tapiiffigineqanngitsoornissaat pisinnaammat pilersaarutaasoq Sisimiunut nuutsinneqarpoq, Kalaallit Nunaanni Assammik Arsartatut Kattuffiat sinnerlugu Nuka Ole Berthelsen allappoq.
U16 GM Sisimiuni ingerlanneqartussami U18-ni arsartussat arlaqarmata pissutaallutik GM aamma Sisimiunut nuunneqarpoq. Aamma illoqarfimmi iligiit peqataasussat amerlanerit qanitaanni pisassasoq aalajangerpaat.
- GHF neriuuteqarpoq Paamiuni peqatigiiffiit amerlanerusunik peqataatitaqarnissartik angusinnaassagaat ukiumut tullermut, taamaalilluni aningaasatigut ukioq mannamiillu angallannikkut pitsaanerusumik inissisimalissasoq, taamaalilluni pissartanngorniunnermik aaqqissuussinissamut periarfissaalerluni, peqatigiiffik qinnuteqarpat nalilersuivigineqassalluni, GHF ilisimatitsivoq.