assammik arsaanneq
GHF-ip siulittaasortaava: Assammik arsaanneq ima ineriartortinneqassaaq
Jørgen Isak Olseni Kalaallit Nunaanni Assammik Arsaattartut Kattuffianni siulittaasunngoqqammertut, qinigaaffimmini suliniutit arlallit aallartinniarpai
- Peqatigiiffiit sineriammi amerlanerusunik unammisalissapput. Taamatummi unammisartunik ineriartortitsisoqartarpoq.
Kalaallit Nunaanni Assammik Arsaattartut Kattuffianni siulittaasunngoqqammertoq, Jørgen Isak Olsen taama oqarpoq, taanna sapaatiummat assammik arsaattartut kattuffiani unammillerteqarani siulittaasunngorpoq.
- Peqatigiiffiit amerlanernik unammisalissappata, peqatigiiffiit aamma akisussaaffimmik tiguseqataasariaqarput. Suliffeqarfinnik suleqateqarneq aallartissavarput, taakkua logistimik aqutsisuupput, piviusunngortinneqassappallu kommuneqarfiit aamma suleqatigissavagut, Jørgen Isak Olsen erseqqissaavoq, qinigaafimminilu taanna unammilernarnerpaassasoq oqaatigalugu.
Atuaruk: Kalaallit Nunaanni Assammik Arsartartut Kattuffiata siulittaasortaava
Siulersuisut iliuuseqarusunnerusut
Taassuma ukiuni arlalinngortuni NÛK-p niaviarsiarartai sungiusangarisimavai, Nunatsinnilu assamik arsaannermik pissartanngorniunnerit naammasseqqammertumi Team Nuummut sungiusaasuuvoq – iligiit taakku GSS-ip NÛK-llu niviarsiarartaasa inuussuttortai kattussuunneqarsimasut, pissartanngorniunnermilu sølvinnattut.
- Nunatsinni assammik arsaannerup qanoq ineriartortinneqarnissaanut eqqarsartuarneq tamaanga killeqassaaq. Aalajagiinerit amerlanerit pisalissapput. Nunap immikkoortortaqarfiini unamminerit aallarniutaasinnaapput, ajugaasulli unamminernut pingaarutilinnut ingerlaqqittarlutik, GHF-p siulittaasortaava oqarpoq, pilersaarutillu ukiut marluk iluani piviusunngortinneqarnissaat neriuutigaa.
Peqatiiffiit akisussaaffeqarnerussasut
Timersuutip iluani peqatigiiffiit amerlanerit eqeersimaarnerusariaqarput, taanna oqarpoq.
- Peqatigiiffiit aallartisarneqaqqinnissaat, siulersuisut pimoorullugu suliarissavaat. Peqatigiiffiit Nuummeersut, Sisimiuneersut Ilulissaneersullu ullumikkut eqeersimaarnerupput. Amerlanerit eqeersimaarnerunissaat uagut suliassaraarput.
- Tamanna aamma meeqqat inuusuttuaqqallu peqatigiiffiinut atuuppoq. Meeqqat amerlanerit assammik arsaannermik soqutigisaqalersinniarlugit iliuuserisimasartakkatsinnit annertunerusumik iliuuseqassaagut. Tamannalu anguneqassappat, sungiusaasunik pikkorissartitsisoqassaaq, sineriammilu angalaassaagut tassani peqatigiiffiit aallartisaqqinnissaminnut suut pisariaqartinneraat oqaloqatigiissutigissallutigit. Tassanngaanniit peqatigiiffiit siunnersussavagut, aammalu neriuutigaarput peqatigiiffiit akisussaaffimmik tigusinerujumaartut, Jørgen Isak Olsen tikkuaavoq, taanna ulluinnarni Aalisarnermut, Piniarnermut Nunalerinermullu Naalakkersuisoqarfimmi pisortaavoq.
Unammilligassat qilanaarigai
Assammik arsaattartut kattuffiani siulittaasuunermini, suliffimmini misilittakkani atorluarnissaanut piareersimavoq.
- Ukiuni arlalinni siulittaasunngorusuttarsimavunga, kisianni siulersuisut qanoq suleriaaseqarnersut takoqqaarusussimallugu. Taamaammat aallaqqaammut siulersuisuni ilaasortaasimavunga. Massakkulli siulittaasunngorniarnissannut piffissanngorsorisimavara, unammilligassaajumaartunulli qilanaarpunga, Jørgen Isak Olsen oqarpoq.