Greenland Facility Services
GFS amigartuungaatsiarpoq, tamanna naatsorsuutit takutippaat
Ukioq siulleq Greenland Facility Servicesimi aningaasat aniapput, taanna 8,2 millionit koruuninik amigartoortunik naatsorsuutinik saqqummiussivoq. Ukiup siuliani suliffeqarfik ISS Kalaallit Nunaannik taaguuteqarallarami, 4,7 millionit koruuninik sinneqartoornermik saqqummiussigaluarpoq.
ISS Kalaallit Nunaata pisiarinnittuanut 2016-imi maajip 15-anni piginnittunngorneq akisusimavoq, 2016-imut ukiumut naatsorsuutit tamanna takutippaat, amigartoorutit 8.245.468 koruuniullutik.
Nunaqartut piginnittunngortut
Nunaqavissut inuussutissarsiortut, ISS Kalaallit Nunaannik piginnittunngortut, Nunatsinni illoqarfinni assigiinngitsuni arfineq-pingasuni kiffartuussinernik assigiinngitsunik, eqqiaanermik, nutsernernik, ikuallannermut annaassiniarnermullu atortunik nioqquteqarnermik, kiisalu ulloq unnuarlu inuttaqartunik isumannaallisaanermik kiffartuussinernik ingerlataqarpoq.
Piginnittunngornerisa kingorna suliffeqarfik allanngortiterisimavoq, ukiumut naatsorsuutit saqqummiunneqarneranut atatillugu aqutsisut nalunaarumminni oqaatigaat.
- Taamaaliorneq sulisut allanngornerinik aamma suliat ingerlanneqarnerinik allannguinermik malitseqarnikuuvoq. Taakku allannguinerit annertuuteqartitsipput, siulersuisut allapput.
Angusat naammaginanngitsut
- 2016-imi kaaviiaartitat ataatsimut sulianut naammaginanngillat, aningaasartuutillu amerlinerat ukiumi angusat naammaginanngilluinnarsimapput, siulersuisullu naatsorsuutaannut naapertuutinngillat, siulersuisut ukiumut naatsorsuutini naqissusiipput.
Kaaviiaartitat ukkatarinerulernerisigut aamma nalimmassaanikkut 2017-imi angusat pitsaanerujussuunissaat, siulersuisut naatsorsuutigaat.
Nammineq aningaasaatit affaannanngungajattut
Nammineq aningaasaatit ikileriarujussuarput, 2015-imi 23,4 millionit koruunininngaanniit siorna 12,2 millionit koruuninut. Suliffeqarfik taarsigassarsianut 25 millionit koruunit sinnilinnut pisussaaffeqarpoq.
Ingerlatseqatigiiffiup pisortaaneraa Ole Bøgh Ulriksen, ukulu siulersuisunut ilaasortaapput: Søren Lennert Mortensen, Christian Keldsen aamma Benny Pedersen.