GEUS: Karrat kangerluani suli aarlerinartoqarpoq

Kommunefogediusimasup Mikkel Jerimiassenip sapaatip akunnerata siuliani puisinniartilluni qaqqap ilarujussua sisoorsimasoq takuaa, taamaammat taassuma inerniliuppaa tassaarsuaqaqqinnissaanut aarlerinaateqarunnaartoq.

Nalunaarut pakatsinartoq

Ilimatsaateqarnerlu eqquutinngilaq, taamaammat Illorsuamit qimagutitsinneqarsimasut najukkaminnut utersinnaanngikkallarput. Taakku ukioq kingulleq junip qaammataani tassaarsuaqarnerata kingorna nunaqarfimmiit qimagutitsinneqarput uteqqusaanatillu.

GEUS-imit erngertumik nalunaarut:

-Sumiiffimmi qaqqat arlallit sisoorsinnaanerat suli annertuumik aarlerinaateqarpoq. Tassa annertuumik sisoortoqaraluarpalluunniit suli annertunerusumik sisoortoqarsinnaanera aarlerinaateqarpoq, GEUS ullaaq Pinngortitamut Avatangiisimullu Naalakkersuisoqarfimmi pisortamut taama nalunaaruteqarpoq.

Sumiiffik suli aarlerinartorsiorfiusoq

- Taamaammat Upalungaarsimanermut Ataatsimiititaliap nalilerpaa, Nuugaatsiami Illorsuarmilu taakkulu kangerluini sumiiffiit suli aarlerinaateqartutut isigineqartariaqartut. Malitsigisaanik Upalungaarsimanermut Ataatsimiititaliap nalilerpaa, tunngavilersuutigineqartut pissutigalugit innuttaasut suli Nuugaatsiamut Illorsuarmut suli utertinneqassanngitsut sumiiffiillu aarlerinartorsiorfiusut eqqaanni angalasoqassanngitsoq, GEUS-ip Naalakkersuisoqarfimmut nalunaarutaani allassimavoq.

Mette Skarregaard Pedersen upalungaarsimanermut akisussaasuusoq pisoq pillugu oqarpoq:

- Suli navianartorsiorfiuvoq. Innuttaasut aarlerinartorsiunnginnissaat pingaarnerpaavoq, taamaammaat Nuugaatsiami Illorsuarmi taakkulu kangerluini suli aarlerinaateqarnera paasitissallugu pingaaruteqarpoq, Mette Skarregaard Pedersen erseqqissaavoq.

Qaammataasakkut alapernaarsuineq

GEUS sumiiffimmi qaqqat malinnaaviginiarlugit qaammataasakkut assiliisarpoq. Sumiiffillu taamaallaat ullut arfinilikkaarlugit qaammataasamit qulaanneqartarpoq. Tassa qaqqamik sisoortoqaqqissangaluarpat ullualuit qaangiunnerini aatsaat oqartussanit paasineqarsinnaavoq.