Greenland Express Air

Gert Braskip taamaatitsinermut nassuiaataa eqqunngitsoq

Greenland Express Airip timmisartuussinissaa pingasunngormat sapaatip akunneri marlunnik kinguartinneqarmat oqaatigineqarpoq, Angallannermut Aqutsisoqarfiup qaammatit tallimat sinnerlugit sullissinera annertuumik kingunerlutsitsisoq. Taamannak nassuiaaneq eqqunngitsoq maanna paasinarsivoq

Greenland Express Airip pisortaanera, Gert Brask. Assi toqqorsivimmit

- Akuersissutinik kingusinaarluni pissarsineq pissutaalluni taamaatitsineq, ajusaarpugut.

Taamak emaili qulequtalerlugu Greenland Express Airip pisortaanera, Gert Brask, pingasunngorneq julip aallaqqaataani timmisartoqarfinnut nassiussivoq. Pilersitsisoq tusagassiuutinut nalunaarummik kingusinnerulaakkut nassiussivoq, Angallannermik Aqutsisoqarfik qaammatit tallimat sinnerlugit Greenland Express Airip qinnuteqaataa suliarineqarsimasoq,

Atuaruk: Gert Brask: Pissutsit kikkunnut tamanut kipiluttunartorujussuupput

Angallannermut Pisortaqarfiup isornartorsiuineq tupigaa
Angallannermik Aqutsisoqarfiup pisuutitsineq tupigusuutigaa, tassanilu pisortaasup Britt Skovdal Rasmussenip Sermitsiaq.AG-mut ilisimatitsissutigaa sukkasuumik iliuuseqarsimallutik:

- Aatsaat ukioq manna juunip 17-iani qinnuteqaat tiguarput, piffissami sivisuumi Greenland Express Airimit qinnuteqaammik takkuttoqqassanerarlugu ilisimatinneqallattaareerluta. Qinnuteqaat 29. juni akuerineqarpoq, taamatullu akuersissutip uppernarsarnera ingerlatitsisumut Greenland Express Airimuunngitsoq tunniunneqarpoq. Tamannalu pivoq, paasissutissanik allanik qinnuteqaammut tunngatillugu piumasaqaqqaarsimanitta kingorna.

Taamaammat Britt Skovdal Rasmussen isornartorsiuineq paasisinnaanngilaa:

- Angallannermut Pisortaqarfiup isornartorsiuineq paasisinnaanngilaa.

Billund mittarfia: Aallarnissaq ullormik sioqqullugu taamaatitsineq
Greenland Express Airip ukiup ataatsip ingerlanerani timmisartuusseqqeqqaarnissaralua ullualunnik sioqqullugu ulappusersimannguatsiarpoq. Assersuutigalugu mittarfeqarfiit attuumassuteqartut kingusissukkut ilisimatinneqarput, tamannalu Billundimi mittarfimmi tuniniaanermut pisortaq, Jesper Klausholm, naapertorlugu e-mailikkut pivoq:

- Timmisartuussinerit juunip aappaani aallartittussaagaluarput, kisianni taamatitsinerit pingasunngornermi ullaakkut (juulip aallaqqaataani, red.). Tassa timmisartup aallarnissaralu ullormik sioqqullugu.

Jesper Klausholmip ilanngullugu Sermitsiaq.AG-mut oqaatigaa, kinguartitsinerit Danmarkimi mittarfiit annersaasa tullia timmisartuussiffiginissaanut periarfissanik allannguinngitsoq:

- Greenland Express Air slotimik taaneqartartumi inissisimavoq, taannalu Billundip mittarfianiik utimullu timmisartorsinnaanermut periarfissiivoq. Taanna akuersissutinik mittarfinni Kastrupimi aamma Billundimi tunniussisartumit Airport Coordination Denmarkimit akuersissut tunniunneqartarpoq. Sloti ukiup ilaanut atuuttarpoq, ukiumullu marloriarluni paarlaattarluni, ukiuuneraniit aasaraangat - imaluunniit killormut pisarpoq.

Kinguartitsinermut atatillugu Greenland Express Airip ilisimatitsissutigaa, timmisartuusseqatigiiffik aatsaat 15. juli timmisartuussisinnaasoq.

Gert Brask sivisuumik Sermitsiaq.AG-mit apersorneqarusuttarsimanngilaq.

Greenland Express Air pillugu allaaserisat uani atuakkit

Powered by Labrador CMS