Gert Brask umiarsuarnik takornariartitsisarnermik ingerlatsilersoq
Timmisartortitseqatigiiffinnut arlalinnut, ilaatigut Greenland Expressimut, tunuliaqutaasimasup, ingerlatseqatigiiffik Arctic Cruise Line, takornarianik umiarsuarnik Kalaallit Nunaannut angallassisartussaq, pilersippaa.
Danmarkimi Kalaallit Nunaannilu aallarnisaasoq inuussutissarsiutinillu ingerlatsisoq, Gert Brask, timmisartortitseqatigiiffinnut arlalinnut, ilaatigut maanna matoreersimalersumut Greenland Expressimut, tunuliaqutaasoq, umiarsuarnik takornariartitsisarnermik suliaqalerpoq. Tamanna inuttaata nammineq Sermitsiamut oqaluttuaraa.
Misigisassat nutaat
– Issittumi umiarsuarnik takornariartaatinik takornarianik angallassisarnerup ineriartorteqqinnissaanut atatillugu periarfissanik angisuunik misigisassanillu nutaanik, umiarsuit takornariartaatit nalinginnaasumik neqeroorutigisartagaannit allaanerusunik, neqerooruteqarnissamut periarfissaqarfiusunik, takusaqarsinnaavunga. Misigisassalli suut pilersaarutiginerakka oqaatigisinnaanngilakka, suliaqarfimmi ingerlatsisunit allanit paasissutissat tamakkua pissarsiarineqarusummata. Isumaqarpunga Kalaallit Nunaat Issittorlu annertunerujussuarmik tunniussassaqartut. Soormi uagut kalaallit neqeroorutinik nammineerluta ineriartortitsigutta, Kalaallit Nunaat uagut nammineq takutikkusuttarput takornarianut takutissinnaaniassagatsigu, Gert Brask oqarpoq, umiarsuarnillu takornariartitseqatigiiffiutini Arctic Cruise Linemik atsersimanerarlugu.
Gert Braskip Rolls-Royce ataqqisaasoq umiarsuit marluk tamarmik immikkut 200-nik ilaasoqarsinnaasut ilusissaannik ineriartortitsisussanngortissimavaa. Umiarsuit sananeqarnissaat ataatsimut katillugit 160 millioner dollarsinik akeqartussatut nalilerneqarpoq. Gert Brask maanna suliniummut peqataasussanik aningaasaliisussarsiorpoq suleqatissarsiorlunilu.
Suliniut pillugu Sermitsiami paasisaqarnerugit. Aviisi uani ataani pisiariuk: