Gert Brask: Inuit qularnerat paasisinnaavara

Timmisartuutileqatigiiffimmi suli aallartissimanngitsumi Greenland Express Airimi aqutsisoq aallartitsisorlu Gert Brask Hollandimiunik Denim Air ACMI-mik suleqateqalersimalluni ataasinngormat tusagassiutinut nalunaaruteqarpoq. Tassani timmisartoq Fokker 100, inunnik 100-nik ilaasoqarsinnaasumik pissarsisimalluni nalunaaruteqarluni. Greenland Express Air juunip aappaani Danmarkimi, Kalaallit Nunaanni Islandimilu timmisartuussisalissalluni nalunaarutigaa.

Gert Brask timmisartuutilioqatigiiffimmik akikitsumik aallartitsiniarnera Atuagalliutini 2012-mi allaaserineqaqqaarpoq, nunatsinni Danmarkimilu tusagassiorfinnit assigiinngitsunit sammineqangaatsiarluni.

Apeqqutigineqartuni akissummini ilaatigut Gert Brask oqarpoq, inuit ilaasa pilersaarutigineqartumut qularnerat paasisinnaallugu.

Greenland Express Air Hollandermiut timmisartuutileqatigiiffiannik Denim Air ACMI-mik isumaqatigiissusiorsimasoq apriilip 21-ani nalunaarutigineqarpoq. Tassanilu timmisartumi 100-nik ilaasoqarsinnaasoq nalunaarutigineqarluni. Timmisartoq qanoq ittuunersoq nassuiarsinnaaviuk?

- Timmisartoq 1995-iminngaanneersuuvoq paarilluagaalluni maleruaqqusaasullu malillugit ingerlalluni. Issiavittai nutaajupput pitsaasuullutillu, Facebookimi quppernitsinni takuneqarsinnaalluni.

Juunip aappaani timmisartuussinerit Danmarkimi, Kalaallit Nunaanni Islandimilu aallartissasut tusagassiutinut nalunaaruteqarputit, tamanna eqquutsissangatippiuk?

- Timmisartoq piareeqqavoq, billetsileriffissaq isumannaangajalerpoq, angallassinissamut pilersaarut piareeqqavoq, timmisartoqarfinnullu tunngasut piareeqqallutik. Piffissamut eqquinissarput qularinngilarput. Silali pissutaalluni kinguaattoortoqassagaluarpat uagut pisuutinneqarsinnaanngilagut.

Aki appasissoq
Sulisut qanoq amerlatigippat? Suut atorneqassappat?

- Sulisunik suleqateqarpugut, taamaasilluni aningaasartuutikinnerussalluta, tamannalu akigitinneqartunut malunniussaaq.

- Greenland Express Airip ineriartornissaa sulissutigineqassaaq, siunissami angallassinerit amerlanerusut anguniarneqassallutik, kiisalu sulisut pitsaasut sulisorineqalissallutik. Aamma kalaallisut oqaluttunik sulisoqalerumaarpoq.

Siumoortumik pisisoqarsinnaanngilaq
Apriilip 30-ni billetsinik pisisoqarsinnaalissasoq tusagassiutinut nalunaarutigineqarpoq, kiisalu aqqutit qulingiluat saqqummiunneqarlutik. Mittarfiit sorliit atorneqassappat?

- Aalborg, København, Keflavik, Kangerlussuaq aamma Narsarsuaq. (Talerpiata tungaani pdf-inngorlugu takuneqarsinnaavoq)

Susoqassavami inuit inniminniippata, paasinarsillunilu Greenland Express Air angalanavianngitsoq, tassanngaannit susoqarsinnaassava?

- Inniminniisarfitsigut kisimi inniminniisoqarsinnaassaaq, kredit imaluunniit korti atorlugu kisimi akiliisoqarsinnaassaaq. Angalasut aatsaat angalareerneranni akiliutigineqarsimasut Greenland Expressimut annguttassapput, akileereertoqarsinnaanngilaq. Ilaasut aningaasaatitik annaanissaat angalasimanngikkunik taamaasilluni ernumassutissaqanngillat.

Qulartut paasisinnaavai
Sermitsiaq.AG-mi ilaatigut uunga qularlutik allattartut paasisinnaavigit?

- Aap paasisinnaalluarpakka. Qanoq oqariartuuteqartassanerlunga ukiuni marlunni kingullerni paasinikuuara, aamma nassuerutigisariaqarpara arlaleriarluta neriorsuisoortarsimagatta eqquutinngitsunik.

Qulartut qanoq oqaaseqarfigisinnaavigit?

- Neriuppunga qularnerpaasut juunip aappaani isumartik allanngortikkumaaraat, maannakkullu piffissaliussaasoq malipparput neriorsuutaareesumillu timmisartuussisalissaagut.

Aalborgimi timmisartoqarfiup pisortaata Søren Svendsen aviisimi Nordjyskemi ilaatigut oqarpoq aallarniutigineqarsimasut ajunngitsuusut, suliaq ilumoortuusoq, timmisartuutileqatigiiffiullu timmisartuussisalernissaa taperserneqarluni, kisiannili siunissami qaninnerusumi piviusunngornissaa ilimagineqarnani. Oqaasii qanoq isumaqarfigaagit?

- Apeqqut Søren Svendsenimut apeqqutigisinnaavat, Aalborgip timmisartoqarfia sinnerlugu oqaaseqarsinnaanngilanga, Gert Brask oqarpoq.