Gerda Tellesen Qaqortumi arnatsialattut toqqarneqarpoq

Arnat ulluanni arfininngormat ingerlanneqartumi Qaqortumi arnatsialammik toqqaasoqarpoq, Qaqortumi toqqaasarnerit Arnarulunnguamik taaneqartarput.

Gerda Tellesen 1961-mi inunngortoq Arnarulunnguatut nersorneqarpoq.

Gerda Tellesenip toqqarneqarneranut ilaatigut ningiuulluarnera, meeqqanut paarsillaqqinnera, tatiginartuunera, maligassiuisuunera ammasuullunilu qiimasuunera tunngavilersuutaasunut ilaapput.

Gerda Tellesen oqaluttuarpoq ilaqutariillutik 1972-imi Paamiunit Qaqortumut nuullutik. Marlunnik meeraqarpoq marlunnillu qitornavissiaqarluni. Marius Tellesenimut katinnikuuvoq. Sisamanik erngutaqarput taakkunanngalu pingasut najugaqatigalugit.

Gerdap erngutani timersoraangata tapersersorluartarpai, nerrivimmi arsaarartarlutillu isikkamik arsartartuupput.

Pingasoriaq Arnarulunnguamik nersorinnittoqareerpoq, siullermik Amma Kleist, tulliani Sofie Kielsen, ukioq kingullerlu Pilunnguaq Benjaminsen nersorneqarluni.