Geisler: Ilinniartitsinermut Naalakkersuisoq akinngitsoorpoq

Meeqqat atuarfianni vikarit qanoq atorneqartiginersut Naalakkersuisut ilisimanngilaat. Ilinniartitaanermut Naalakkersuisup, Ane Lone Baggerip (S) paragraf 37 atorlugu akissuteqaataani tamanna atuarneqarsinnaavoq.

Sofia Geisler (IA), apeqquteqartuuvoq. Taannalu isumaqarpoq ilinniartitaanermut naalakkersuisoqarfiup ilinniartitaanermullu aqutsisoqarfiup ilisimasariaqaraluaraat meeqqat atuarfianni vikarit qanoq atorneqartiginersut.

- Nakkutilliisussaallutik atorfinitsinneqarnikuupput, taamaammat isumaqarpunga apeqqutit akisariaqaraat, Sofia Geisler, Inatsisartuni ilinniartitaanermut ataatsimiititaliami ilaasortaasoq oqarpoq.

Meeqqat atuarfianni vikarit qanoq atorneqartiginerisa ilisimaneqannginnerat ilungersunarluinnartuusoq, taanna isumaqarpoq.

- Atuartitsinermi vikarit qanoq atorneqartigineri ilisimanngikkutsigu naluarput meeqqat atuarfianni atuartitsineq inatsisit atuuttut malillugit piumasaqaatinut naapertuunnersoq, Sofia Geisler oqarpoq.

Akisussaaffimmiit peerneqassanngillat

Paragraf 37 atorlugu apeqqummut akissuteqaammini Ane Lone Bagger allappoq Naalakkersuisut paasissutissanik
katersuinissamut pilersaaruteqanngitsut, ilanngullugulu erseqqissarlugu tamanna kommunip akisussaaffigigaa.

- Suliassaqarfik kommunimut tunniunneqarsimammat imaanngilaq Naalakkersuisut akisussaaffimmik iparaassasut. Naalakkersuisut Inatsisartut peqatigalugit inatsisinik atuuttussanik aningaasaliinernillu aalajangiisartussapput, taamaammat pisariaqarpoq unammillernartut suunersut paasissallugit, Sofia Geisler naqissusiivoq.

Ilanngullugu Geislerip tikkuarpaa, meeqqat atuarfianni vikarinik atuineq qulaajarneqarpat paasinarsilluassasoq meeqqat atuarfiini nuna tamakkerlugu ilinniartitsisut qassit amigaatigineqarnersut.

Aallartigitsi

Ane Lone Bagger oktobarip aallartinnerani Ilinniartitaanermut Naalakkersuisunngorpoq, Sofia Geislerilu isumaqarpoq piffissanngortoq sulianik tassanngaanniit takusaqartariaqarnerput.

- Oqaluttarfimmiit arlaleriarluni oqareerpoq nutaajulluni sulianullu tunngasunut iserluaqqaartariaqarluni. Piffissangaatsiarujussuaq ingerlareersoq isumaqarpunga. Meeqqat atuarfiat pillugu sunik politikkikkut takorluugaqarnerluni anguniagaqarnerlunilu takutittariaqalerpaa, Sofia Geisler naggasiivoq.