Arsaannermi GM
GBU-p siulittaasua: GM-imi ilimanaatillit ukuupput
Angutit isikkamik arsaallutik GM-ernerat Nuummi ullumi aallartissaaq. GBU-p siulittaasuata kikkut ingerlalluassanersut eqqoriarpai
Arsaalluni pissartanngorniunnerit Nuummi ataasinngornermi aallartissapput.
GBU-p siulittaasuata John Thorsenip timersoqatigiiffiit sorliit angusarissaassanersut eqqoriarpaa.
- B-67 Nuummeersut, G-44 Qeqertarsuarmeersut kiisalu Nagdlúnguak Ilulissaneersut ukiuni kingulliusuni angusarissaartarput. GM-imi aamma qaffasissumik inissinnissaat naatsorsuutigineqarsinnaavoq, John Thorsen Sermitsiaq.AG-mut oqarpoq.
Tupaallatitsisoqarsinnaasoq aamma oqaatigaa.
- NÛK Nuummeersut aamma Eqaluk 54 Tasiusameersinnaasut tupaallatitsisinnaapput. Arsaannermi qanorluunniit pisoqarsinnaavoq, taamaammat eqqoriaaninni imaassinnaasoq uniortunga, GBU-p siulittaasua oqarpoq.
Futsal ineriartortitseqataasoq
Arsaattartut ukiuni kingullerni ineriartortut malugaa.
- Illup iluani futsalimik arsaattarnerit arsaattartunut ataavartumik sungiusartitsisarpoq. Futsalimi arsaaffiup annikinnera pissutaalluni tunioraattoqartariaqartarpoq naqqatigut. Tamanna arsaattartut silamut nuussinnaassaneraat pissanngatigaara. Arsaattartut teknikkikkut pitsaanerulersimasut, tamanna siuariartorneruvoq, John Thorsen oqarpoq.
Aaqqissuisut NÛK Nuummeersut kiisalu G-44 Qeqertarsuarmeersut GM-imi unammeqqaartuussapput. Unamminerat nalunaaqutaq 13.00 aallartissaaq, KNR-TV-kkut toqqaannartumik aallakaatinneqassalluni. Unamminerit amerlanerit KNR-ikkut takutinneqassapput.
GM-imi kikkut illersorpigit? Oqallinnermi ataani oqalliseqataagit