soraarsitsineq
GBU-mi siulittaasoq: Nunatsinni ammip qalipaataanik immikkoortitsisoqanngilaq
Kalaallit Nunaanni Isikkammik Arsaattartut Kattuffiat (GBU) ammip qalipaataat pillugu saaffigineqarsimanngisaannarpoq, siulittaasoq Gert Fleischer oqarpoq. Ammip qalipaataanik immikkoortitsinermik ajornartorsiuteqartoqannginnerarpaa.
- Uanga nammineerlunga 2011-mi GBU sinnerlugu Aasianniipput, Teklemut arsartuinulluunniit ammip qalipaataanik immikkoortitsisumik paasissutissanik pinikuunngisaannarpunga.
Kalaallit Nunaanni Isikkammik Arsaattartut Kattuffiani maanna siulittaasoq, Gert Fleischer, Sermitsiaq.AG-mut taama oqarpoq.
Taamatut oqaaseqarneq nunanut allanut unammisartunut sungiusaasuusimasup, Tekle Ghebrelulip, apersorneqarneranut atatillugu pivoq, taanna ippassaq Sermitsiaq.AG-mut, U18-t Aasianni Nunatsinni pissartanngorniunnerannut atatillugu 2011-imi ammip qalipaataanik immikkoortitsisumik suaartarfigineqarsimalluni oqaluttuarpoq.
- Unammisartuutikka pingasut ilanngullugit nillivigineqarpugut, "Kalaallit Nunaat qimattariaqaripput", afrikamilu orpippassuarni inuusariaqartunga, Tekle Ghebrelul.
Aamma atuaruk: Tekle Ghebrelul: Ammip qalipaataanik immikkoortitaaneq ima misigineqartartpoq
Saaffiginnittoqanngitsoq
GBU-mi siulersuisunut ammip qalipaataanik immikkoortitsisoqarneranik paasissutissiisoqarsimanngitsoq, Gert Fleischer oqarpoq.
- Toqqaannartumik tamanna pillugu uannut nalunaaruteqartoqarnikuunngilaq, Gert Fleischer oqarpoq.
Tassami taanna naapertorlugu tamanna Nunatsinni ajornartorsiutaanngilaq.
- Soorunami ammip qalipaataanik immikkoortitsinermut akuersaanngilagut, tassami inoqatigut qanoq ikkaluarpataluunniit nikassarsinnaanngilagut. Nammineq ammip qalipaataanik immikkoortitsisuunani tamanna pillugu oqaaseqaruminaappoq, taanna oqarpoq.
- Ammip qalipaataanik immikkoortitsineq akiorniarlugu GBU qanoq iliorniarpa?
- GBU-p ''Say no to racism'' aallartisarniarlugu suliniuteqarpoq, taanna nunani tamalaani unamminerni takuneqartarpoq. Arsaattartut kattuffia kisimi taamaaliussanngitsoq isumaqarpunga, timersortartut kattuffii allat aamma taamaaliortariaqarput, kisianni ajoraluartumik tamanna suliaq oqaaseqarfigivallaarnianngilara, Gert Fleischer akivoq.
Ilanngullugu oqarpoq:
- Kisianni Nunatsinni ammip qalipaataanik immikkoortitsisoqanngilaq. Immaqa tikeraagut suliartortut immaqa taamatut kisimik pissusilersortarput. Kalaallit Nunaanni ammip qalipaataanik immikkoortitsisoqanngilaq, taanna oqarpoq.
Pissusilersorneq soraarsitsinermut pissutaasoq
Nunatsinni tusagassiorfiit Tekle Ghebrelulip soraarsitaaneranut pissutaasoq sangutinniarsarigaat, taanna isumaqarpoq.
- Kusananngitsumik pissusilersoqattaartarsimanera soraarsitaaneranut tunngaviuvoq, arlaleriarluni mianersoqqussummik tunineqartareerpoq, tamannalu soraarsitaaneranik kinguneqarpoq. Nunanut allanut unammisartunut sungiusaasoq maligassiuisussaavoq. Meeqqammi arsaattunik isiginnaartarput, pisullu arlallit akuersaarneqarsinnaanngillat. Nunani allaniusuuppat ingerlaannaq soraarsitaasimassagaluarpoq. GBU-p malittarisassaanik unioqqutitsivoq, taamaammat soraarsitaavoq, taanna erseqqissaavoq.
Kalaallit Nunaanni Isikkammik Arsaattartut Kattuffiata arsaaffimmiitilluni maligassiuinissaq suliniutigigaa, Gert Fleischer naqissusiivoq.
Tekle Ghebrelul pillugu suliap Gert Fleischer sunnersimavaa.
- Sapaatip-akunnerini kingullerni sakkortuumik isornartorsiorneqarnikuuvugut, oqaatsit sakkortuut uagutsinnut atorneqarlutik. Tunngavissaqanngitsumik uannut isornartorsiortut isumakkeerfigisinnaavakka. Maanna uani suliami ingerlaqqittariaqarpugut, Gert Fleischer oqarpoq.
Kalaallit Nunaanni Isikkammik Arsaattartut Kattuffiani oktobarip arfineq-pingajuanni aallartitat ataatsimiissapput. Siulittaasutut sassarumaarnerluni suli aalajangersimanagu, Gert Fleischer Sermitsiaq.AG-mut ilisimatitsivoq.