Gazprom Issittumi uuliamik tunisassiulerpoq

Gazprom qillerivimmit, qanittukkut Greenpeacemit akerliuniat ikiffigeriaraluagaannit, uuliamik tunisassiulerpoq. Taamatut nalunaaruteqarpoq russit nukissiornermik selskabiat.
Septembarimi akerliuniat qillerivik ikiffigeriaraluarpaat, russilli sinerissami nakkutilliisoqarfiannit unitsinneqarput tigusarineqarlutillu.
Aamma atuaruk: Greenpeace iperaaneq pillugu: Eqqissiallaqaagut
Aamma atuaruk: Tunumi uuliasiortoqalissaaq
Kingorna perulluliortutut unnerluutigineqarput, akerliunialli, qallunaaq arnaq ilanngullugu, præsident Vladimir Putin-ip saammaateqqammerpai.
Uuliamik suliniut pilersaarummit ukiunik qulingajannik kinguaattooqqavoq, Reuters allappoq, taannalu taallugu nukissamik suliniut assortuussutaasoq.
Greenpeacep avatangiisinillu illersuiniaqatigiiffiit allat tikkuarsimavaat Issittumi avatangiisit uuliaarluernermit sunnertiasorujussuusut.
Putin-ili oqarsimavoq Ruslandip Issittumi uuliaqarfinnit tunisassiornera Ruslandip inissisimaneranut pingaaruteqartoq.
Tallimanngormallu Gazprom nalunaaruteqarpoq uuliamik tunisassiulersimalluni.
– Ruslandip issittumi ineriartortitsineranut maligassiuisuussaagut, Gazprom-ip pisortaanera Aleksej Miller oqarpoq.
Suliniummut kingaattoorutaasimapput qillerinermi atortut pisoqaangaatsiarnerat, teknikkikkut ajornartorsiuteqarnerit, aammalu Gazprom-ip akuersissutit pisariaqartut pissarsiarinissai ajornartorsiutigisimammagu.
Maannali suut tamarmik inissinneqarsimapput tunisassiornerlu aallartinneqarpoq.
Greenpeacep tamanna mianersoqqussutigisimavaa uuliamillu tunisassiornerup aallartinnera taallugu "Ulloq Issittumut ajorsarfiusoq".
– Gazprom nunarsuarmi selskabini siullersaavoq issittup imartaanit nillertumit uuliamik qalluisoq, selskabillu isumannaallisaanermut oqaluttuassartaa tupannaqaaq. Upperiuminaatsorujussuupput nunarsuup ilaani sunnertianerpaami kusanarnerpaamilu qillerinermi isumannaatsuuneq eqqarsaatigalugu, Greenpeace oqarsimavoq.
Reuters allappoq uuliasioqatigiiffiit angisuut arlallit Ruslandimik isumaqatigiissuteqarsimasut Ruslandip eqqaani issittup imartaani uuliasiulernissamik. Ilaatigut tassaapput ExxonMobil aamma Statoil.
Naatsorsuutigineqarporli selskabit aatsaat 2020-p affaani kingullermi uuliamik tunisassiulerumaartut.