pisassanik qaffaaneq
GA: Saattuartassanik qaffaaneq unioqqutitsineruvoq
Naalakkersuisuungallartut Nuummi Paamiunilu saattuartassat ataasinngormat 1.200 tonsinngortillugit qaffappaat. Saattuartassanik qaffaaneq unioqqutitsinerusoq, GA maanna oqarpoq
Naalakkersuisuungallartut Nuummi Paamiunilu saattuartassat ataasinngormat 1.200 tonsinngortillugit qaffappaat, ukiumoortumut pisassat 950 tonsit septembarimi nungunneqareersullu.
Kisianni aalajangerneq malittarisassanut unioqqutitsinerusoq GA isumaqarpoq.
Aalisarnermummi siunnersuisooqatigiit tusarniaqqaarnagit Naalakkersuisuungallartut saattuartassanik qaffaapput.
- Sulisisitsisut tungaanniit tamanna eqqarsarnartoqartipparput, saattuartassanik pisassiineq Aalisarnermik Siunnersuisooqatigiit avaqqullugit pimmat, Brian Buus Pedersen, Sulisitsisut Peqatigiiffianni, GA-mi, pisortaq, oqarpoq.
- Pisassanik qaffaaneq tunngavilersorneqarpoq aalisartut aalisarnissaminnut periarfissinniarlugit ukiup sinneranut. Suliarlu Aalisarnermi Siunnersuisooqatigiit eqqartorsimanngimmassuk apeqquserusunnarpoq taamatut avataani sinerissallu qanittuani pisassat ataatsimuulersinneqarneri, tassami saattuaqarfiit immikkoortuusut saattuaqassutsimik siunnersuinerup ersersimmagu, Brian Buus Pedersen oqarpoq.
Brian Buus Pedersen najoqqutaralugu Sulisitsisut aamma tupigusuutigaat Naalakkersuisuungallartut taama annertutigisumik politikkikkut pisinnaatitaammata.
- Uanilu aperisariaqarpoq nutaamik malittarisassanik aalajangersaasoqarsimanersoq? Brian Buus Pedersen aperaaq.