qinersineq

GA: Qineqqusaartut piffissap ilungersunartuunera takusinnaasariaqarpaat

- Politikkikkut allamut saaqattaartoqarnera aningaasaliiniarnit malugineqarpoq, Sulisitsisut Peqatigiiffiata pisortaa oqarpoq. Nunatta aningaasaqarnera ilorraap tungaanukartinnissaanut iliuuseqartoqarnissaa piffissaasutut oqaatigaa

Sulisitsisut Peqatigiiffiata pisortaa, Brian Buus Pedersen

Kalaallit Nunaata aningaasaqarnerata inissisimanera partiinit Inatsisartunilu qineqqusaartunit sammineqarnerusariaqarpoq.

Sulisitsisut Peqatigiffianni pisortaq Brian Buus Pedersen qineqqusaartoqarnerani oqaaseqaateqarpoq.

Kalaallit Nunaata aningaasaqarnerata ilungersunartumik inissisimanerata pitsanngornissaa qineqqusaartunit tikikkuminaatsinneqartoq oqaatigaa, tassami taanna qineqqusaarnermut qitiulluinnartuummat.

- Qineqqusaarnermi partiinit anguniagassatut pilersaarutitut maannamut saqqummiunneqartut tunngavigalugit, isumaqarnarpoq qineqqusaartut piviusorsiunngitsumik neriorsuillaqqinniunnermik qineqqusaarput. Tamanna ajuusaarnarpoq, aningaasaqarnerpummi maannakkut iluarsineqartariaqarpoq. Tamannalu takutiinnarpaa suli politikkikkut nunarput inerisimanngitsoq, Brian Buus Pedersen oqarpoq.

Aningaasatigut ajalasooriaannaaneq
Aningaasaqarnerup ilorraap tungaanut saatinneqassappat Brian Buus Pedersen isumaqarpoq politikkereqartariaqartoq tatiginartunik. Qinigaasussat inuiaqatigiinni suut pisariaqartinneqarnersut oqaatigisinnaasariaqaraat oqarpoq, aningaasaqarnermi nammaqatigiinnerusumik ingerlalertariaqartoq isumaqarluni.

- Taama pisoqanngippat aningaasaqarnerput alalusoorsinnaavoq, Sulisitsisut Peqatigiiffiannit oqaatigineqarpoq.

- Politikkikkut nammaqatigiissumik suleqatigiittoqartariaqarpoq. Aningaasarsiorfiusinnaasut nutaat pisariaqartinneqarput, tassani aamma suliffissanik nutaanik pilersitsisoqarsinnaammat. Aningaasanillu kaaviiaartitsineq aamma annertusarneqassalluni.

Politikkikkut allamut saasartoqartarnera pissutaalluni inuussutissarsiornermut aningaasaliiniartunik qimaatitsisartoq oqaatigaa.

- Politikkikkut erseqqissumik siunissamillu atugassaqartitsinissamik erseqqissumik takutitsippat aningaasalersuisartut aatsaat aningaasaliiniartut toqqissisimalissapput, Kalaallit Nunaannullu aningaasaliinissaq piukkunnarnerulissalluni.

Powered by Labrador CMS