Thule Air Base
GA Pituffik pillugu: Maanna siumut isigisariaqalerpugut
Sulisitsisut peqatigiiffiata GA-p ajuusaarutigaa Greenland Contractorsip Pituffimmi kiffartuussinissaminut isumaqatigiissummik annaasaqarnermini naammagittaalliornerminut ilalerneqannginnera
Nunatsinni sulisitsisut peqatigiiffiata, GA-p, kalaallinit danskinillu pigineqartup Greenland Contractorsip maanna allanngortinneqarsinnaangitsumik Pituffimmi kiffartuussinissamut isumaqatigiissumik amerikaminut Exelis Servicesimut annaasaqarnera ajuusaarutigaa.
- Maanna siumut isigisariaqalerpugut sapinngisarpullu tamaat amerikamiut Pituffimmi kiffartuussinissamik isumaqatigiissut tiguppassuk Kalaallit Nunaata isertitanik suliffinnillu annaasaqannginnissaa anguniarlugu, GA-mi pisortaq, Brian Buus Pedersen allappoq.
Atuaruk: Lidegaard neriulluarpoq: Aaqqiissutaasinnaasut amerlapput
Amerikamiut suliarinnittussarsiussinermi naammagittaalliortarfiata, Government Accountability Officep, sisamanngornermi aalajangereerneratigut Exelis Servicesip Pituffimmi kiffartuussinissamut isumaqatigiissut septembarip 30-aniit ukiut tulliuttut arfineq marluk ilanngullugit nangittussanngorpaa. Isumaqatigiissut katillugit 2,5 milliarder koruuninik naleqartoq.
- GA-p uani maluginiarpaa Exelis Servicesip neriorsuutigisimammagu maanna inatsisit, isumaqatigiissutit piumasaqaatillu atuuttut naapertorlugit suliffeqarfiup maanna sulisooreersut sulisitsisutut akisussaassusilittut atorfinitseqqinniarai, aammalu suliffeqarfik Kalaallit Nunaanni Danmarkimilu akileraarutinut akiliisarniartoq, Brian Buus Pedersen allappoq.
Pituffik pillugu allaaserisat allat uani atuakkit