2014-imut aningaasanut inatsit

GA: Missingersuutit malillugit ingerlasoqarpa, Vittus?

GA-p paaserusuppaa 2014-imut missingersuutit malillugit ingerlasoqarnersoq. Kisianni Vittus Qujaukitsoq paasissutissanik tunniussaqarpallaarsinnaanngikkallarnerarpoq

Vittus Qujaukitsoq, naalakkersuisoq for finanser og indenrigsanliggende
Aningaasaqarnermut naalakkersuisuungallartoq Siumumeersoq Vittus Qujaukitsoq

Tallimanngorpat qinersisoqassaq, taamaammat kikkut tamarmik paasisinnaasariaqarpaat nunatta aningaasarnerata qanoq ingerlanera.

Taama isumaqarpoq Kalaallit Nunaanni Sulisitsisut Peqatigiiffiat, GA.

- Vittus Qujaukitsoq nassuiaasariaqarpoq - missingersuutit malillugit ingerlasoqarpoq? Brian Buus Pedersen, sulisitsisut peqatigiiffianni siulittaasoq aperaaq, taanna ima nangippoq:

- Ernumanartorujussuuvoq maanna Naalakkersuisuungallartoq paasissutissanik Namminersorlutik Oqartussat aningaasaqarnerannut tunngasunik uninngatitsippata. Paasissutissammi taakkua nalinginnaasumik qaammatit pingasukkaarlugit tunniunneqartarput aningaasaqarnermut ataatsimiisitaliamut. Taamaaliornikkut saqqummersinniarneqartarput missingersuutit malillugit ingerlasoqarnersoq imaluunniit sippuilluni ingerlatsisoqalernersoq.

300 million koruuninik amigartuulersorooq
Kisianni kvartalikkaartumik nalunaaruteqarnissaq maanna paamaarunneqarpoq, naak missingersuutit qaammatinut pingasunoortut sulisitsisut peqatigiiffiata paasisai naapertorlugit aningaasaqarnermut naalakkersuisoqarfimmit suliarineqareersimagaluartut.

- Kisitsisit aningaasaqarnermut ataatsimiisitaliamut ingerlateqqinneqaannarsimanngillat. Sooq, taama suli pisoqannginnersoq ilaasortat arlallit apeqqutigillattaalerpaat, aamma GA taama apeqquteqarpoq, tassami 300 million koruunit tikillugit amigartoortoqarniartoq tusarsaalerpoq maanna.

Taamaammat sulisitsisut peqatigiiffiat isumaqarpoq Vittus Qujaukitsoq nassuiaasariaqartoq missingersuutit malillugit inissittoqassanngippat.

- Kisianni aamma suut tamarmik ajunngitsumik ingerlappata, taava landskarsip 2014-mut missingersuutaani ajorluinnartumik inissittoqarniarneranut oqaluttunut illuatungiliisariaqarpoq, Brian Buus Pedersen allappoq.

Vittus paasissutissiinissaminut tunuarsimaarallarpoq
Kisianni aningaasaqarnermut naalakkersuisuungallartoq Vittus Qujaukitsoq Sermitsiaq.AG-mut ataasinngornermi annertunerusumik paasissutissiisinnaanani ilisimatitsivoq aningaasaqarnermut ataatsimiisitaliaq suli paasissutissiiffigineqarsimanngimmat.

- Naatsorsuutigaara marlunngornermi annertunerusumik paasissutissiisinnaanera, tassami nunatta aningaasaqarnera pillugu aningaasaqarnermut ataatsimiisitaliaq ullormi tassani ilisimatissagunarakku, Vittus Qujaukitsoq Sermitsiaq.AG-mut oqarpoq.

Kisianni Vittus Qujaukitsup naatsumik nassuiaatigaa ingerlatsinermut tapiissuteqartarnermullu missingersuutit kiisalu inatsisitigut pituttorsimasut aningaasartuuteqarfissat pissusissamittut ingerlasut. Taamaattorli tupamit imigassamillu akitsuutinit isertitassasut naatsorsuutit kiisalu avaleraasartoorniarnermut akitsuutinit isertitassatut naatsuutigisanit annikinnerusumik isertitaqartoqalersoq.

Powered by Labrador CMS