qinersineq
GA Lars-Emil Johansenip isornartorsiuineranut imminut illersorpoq
Kalaallit Nunaata aningaasaqarnera qanoq ilorraap tungaanut saatinneqarnissaanik Sulisitsisut Peqatigiiffiata qinersilernermi siunnersuuteqarnera Siumumit Lars-Emil Johansenip isornartorsiorpaa. Tamanna Sulisitsisut Peqatigiiffiannit paasiuminaatsinneqarpoq
Lars-Emil Johansenip Facebookimini Sulisitsisut Peqatigiiffiat (GA) isornartorsiorpaa. Inatsisartunut qinersinissamut GA akuuallaarsimasoq Siumumi politikkeri isumaqarpoq. Kalaallit Nunaata aningaasaqarnera qanoq pitsaanerulersinnaanersoq GA arlaleriarluni siunnersuuteqarpoq.
Johansen ilaatigut ima allappoq: 'Sulisitsisut Kattuffiat GA pisortani Brian Buus Pedersen aqqutigalugu ulapeqaaq kikkut tamaasa qanoq iliallanninnguit tamaasa oqaluttuutissallugit suna eqqortuunersoq sunalu eqqortuunnginnerosq, suna pingaaruteqarnersoq sunalu pingaaruteqannginnersoq. Sulisitsisunuinnaanngitsoq – taakkumi sullittussaammagit taakkulu akornanni sulinissaminut piginnaatitaasimassalluni. Tassami Nunarput tamaat sinnertutut illugu oqaaseqarnissaminut piginnaatitaaffeqaqqajanngilaq innuttaasut qinersinermikkut tunniussimasaannik.'
Aamma Lars-Emil Johansen ima allappoq: 'Ukiuni kingullerni GA politikkikkut suliniaqatigiiffinngorsimavoq IA-mik qanittuararsuarmik suleqatiginnittoq, allaammi assut taakkununnga assingulersimasoq.'
GA oqaaseqarpoq
GA-p pisortaa Brian Buus Pedersen Sermitsiamut mailimi imminut illersorpoq:
- Sulisitsisut Peqatigiiffiat qineqqusaartoqarneranut ilannguppoq oqariartuuteqarluni politikkikkullu siammasinnerusumik aqutsisoqalernissaa siunnersuutigalugu. Kalaallit Nunaanni aningaasaqarnikkut equngasumik ingerlatsisoqartoq GA-mit oqariartuutigineqarpoq. Pisortat suliffeqarfiini kiisalu isumaginninnikkut amigartoorutit amerliartuinnavipput. Isertitarineqartut ajoraluartumik aamma taama ingerlanngillat. Aningaasaqarneq killormut ingerlavoq soorlu tamanna missingersuutini kingullermi takugipput.
Politikkerinut siammasissumik suleqatigiikkusuttunut qinersisartut qinersinissaat GA-mit kaammattorsimallugit Sulisitsisut Peqatigiiffiata pisortaata Brian Buus Pedersenip oqaatigaa.
Politikkikkut taava kikkut oqallittassappat?
Lars-Emil Johansen nangilluni allappoq: 'Demokrati najoqqutaralugu piginnaatitsissummik peqarnissaq pingaaruteqarpoq, taamaattoqanngippammi demokrati uniorlugu qinikkallu avaqqullugit sulineq ingerlanneqalersimassammat.' kiisalu aamma allappaa 'Kisianni eqqortuusinnaanngilaq qinikkat qinigaanngitsullu suliaat imminnut taputartuullugit ingerlatsisoqalissappat'. Allanneqartut GA-mut isornartorsiutaasut Brian Buus Pedersenip oqaatigaa. Aamma Lars-Emil Johansenip siunnersuutigaa tulliani Inatsisartunut qinersisoqalerpat qineqqusaaqqullugu.
- Kikkut tamat oqartussaaqataanerat taamaasilluni allanngortinneqarpoq. Soqusaqaqatigiit, NGO-t, politikkikkut partiit peqatigiiffii innuttaasullu politikkimut attuumassuteqanngitsut Lars-Emil Johansenip nunarsuaani kisimi politikkikkut oqaaseqartittaleqquai aatsaat Inatsisartunut qinigaasimagaangata. Taamatut oqaaseqarnera navianartuuvoq, Brian Buus Pedersen oqarpoq.