qinersineq
GA: Kalaallit Nunaanni aningaasaqarneq ima ilorraap tungaanut saatinneqarsinnaavoq
Sulisitsisut Peqatigiiffiat Inatsisartunut qinersinissamut siornatigut takuneqarsimanngitsumik akuuvoq
- Kalaallit Nunaata aningaasaqarnerata ingerlalluannginnera innuttaasunut eqquivoq.
Sulisitsisut Peqatigiiffiata GA-p siulittaasua Henrik Leth tusagassiortunut katersortitsinermi ataasinngornermi taama aallarniilluni oqarpoq. Sulisitsisut Peqatigiiffiat Inatsisartunut qinersinissamut novembarip 28-ani pisussamut siunnersuusiorpoq.
Kalaallit Nunaata aningaasaqarnera qanoq ilorraap tungaanut saatinneqassanersoq siunnersuuteqarpoq.
- Inuussutissarsiorneq aningaasarsiornerup siuariartornissaanut qitiuvoq. Politikkerit tungaannit oqallittoqarpallaarpoq iliuuseqartoqanngippallaarlunilu inuussutissarsiornermut eqquisumik. Iliuuseqarnerusoqartariaqarpoq innuttaasuni naligiinngittoqarnera inuussutissarsiortunit pitsanngorsaaffigineqassappat, Henrik Leth tusagassiortunik katersortitsinermi oqarpoq.
- Inuussutissarsiorneq Kalaallit Nunaannut iluaqutaasinnaavoq siuarsaaqataallunilu. Ineriartornermut tunngatillugu qineqqusaartut apererusuppavut qanoq iliuuseqaqataarusunnersut. Eqqortoq unaavoq, inuussutissaarsiorneq siuarsaanermi qitiuvoq, politikkerilli aalajangiisarnerat ineriartortitsinissamut aporfiupput, Henrik Leth oqarpoq.
Iluarsartuusseqqinnissat
Siunissami unammillernartussat aamma saqqummiunneqarput.
- Aalisarneq siunissami ataavartussatut inerisaqqinneqartariaqarpoq. Aningaasaliisoqarniassammat iluarsartuusseqqittoqartariaqarpoq, siunissami aamma aalisarneq aningaasanik isaatitsiviusinnaaniassammat. Aatsitassarsiornerup ineriartornera pingaaruteqarpoq. Aatsaat aningaasaliinissaq kajuminnassappat aatsitassarsiornermi isaatitsisisoqarsinnaavoq. Kalaallit suliffissaannik aamma inerisaaqataasinnaavoq inuussutissarsiornermilu siuarsaaqataalluni, Henrik Leth oqarpoq.