Futsalimik nunanut allanut unammisartut Nordic Cup-imi takutitsinertik naammagisimaaraat

- Ukioq kingulleq Nordic Cup-ertoqarneraniit ikinnerusunik pointinnappugut, ukiormi kingulleq pingasoriarluta ajorsarisimalluta, ukioq manna marloriaannarluta ajorsarpugut. Unammeriaatsini unammeqataalluarsinnaavugut.

Futsalimik nunanut allanut unammisartunut sungiusaasup ikiortaa Kaassannguaq Zeeb, sapaatip-akunnerata siuliani Norgemi Nordic Cup-ertoqarnerani nunanut allanut unammisartut tallimaattut inissereernerisa kingorna, Sermitsiaq.AG-mut oqarpoq.

- Alloriaqqinnissarput piareersimaffigaarput, tassani misilittagaqarnerulerlutalu amerlanerusunik unammissaagut, taanna erseqqissaavoq.

- Ukioq manna Finlandimut unamminermi, unamminerup immikkoortuata aappaani, unammilluaqqippugut. Unamminernilu allani ajugaasimasinnaangaluarluta siuaqqanerit tamaagaannartittarsimavagut. Taamaammat unammisartut ineriartornerat naammagisimaarparput. Skandinaviami unammisartut pitsaanerpaat ilaanniilernissatsinnut annikitsuaqqat kisiisa aaqqitassaraagut. Kalaallit unammisartui siunissarissaarput, Kaassannguaq Zeeb oqarpoq. Ukiullu tulliani unammisartut unammersuarnermi peqataaqqissappata, pitsaanerusumik angusaqarnissaq anguniarneqassasoq, ilanngullugu oqaatigaa.

Unammersuarnerlu unammisartunut pissarsissutaasimasoq, sungiusaasup ikiortaata, oqaatigaa.

- Unammisartuutigut nutaat arlaqarput, allaanerusumillu unammeriaaseqalersimavugut. Unammersuarnermi sakkortunerusumik unammisimasinnaangaluarpugut, unamminernilu siuaqqatilluta kinguaqqatillutaluunniit qanoq unammeriaaseqassanerluta tulliani sammiumaarparput. Målillu saanni eqqarsarluarnerusariaqassaagut, Kaassannguaq Zeeb tikkuaavoq.

- Unammeriaaseq massakkut sungiusarnerussavarput taamasilluta ineriartornerulissagatta, Kaassannguaq Zeeb oqarpoq.

Unammersuarnermi ukioq kingulleq pissartaasimasut Finland, pointit pissarsiarineqarsinnaasut tamakkerlugit, ajugaaqqippoq. Danmark Norgelu aappaattut pingajuattulli inissipput, Sverigelu sisamaattut inissilluni.