Friday, July 28, 2017 - 13:13

Futsalimi unammisartunut sungiusaasoq taamaatippoq: GBU-mut tatiginninngilanga

GBU-mut tatiginninngikkunnaarnini pissutigalugu, René Olsenip atorfimminit taamaatippoq.
Assi.: Leiff Josefsen
GBU-mi siulersuisut nunanut allanut unammisartut sungiusaasuannik Tekle Ghebrelulimik soraarsitseriasaarnerata aamma kattuffimmi futsalimi misilittagalimmik nammatisumillu annaasaqarneranik kinguneqarpoq. Nunanut allanut unammisartunut sungiusaasoq René Olsen taamaatippoq.

- Nunanut allanut unammisartunut sungiusaasutut aamma GBU-p ataani futsalimut ataqatigiissaarisutut ingerlaannaq atuutilersumik tunuarlunga, isumalioqqissaarnerma aamma qanigisannik isumasioqatiginninnerma kingorna GBU-mut nalunaaruteqartariaqarsorivunga, René Olsen GBU-mut allappoq, maannalu siulersuisut aalajangiinerannut tatiginninnginnerminik tamanna tunngavilersorpaa.

Aamma atuaruk: Nunanut allanut unammisartunut sungiusaasoq tupaqqasoq: Soraarsitaavunga

- Suleqatima Tekle Ghebrelulip GBU-mi atorfeqarnera pillugu siulersuisut aalajangiinerannut tamanna tunuliaquteqarpoq. Suliami Teklep ingasattumik ajuallatsinneqarnerani aamma ammip qalipaataanik immikkoortitsiffiunera, qularnartumik tunngavik pissutigalugu siulersuisunit soraarsinneqarsinnaanera nikallunganartittorujussuuara. Maanna siulersuisuusut aalajangiisinnaanerannut tatiginninngilanga. Tassunga atatillugu aamma siulittaasuusimasup John Thorsenip taamaatinnera sunniuteqaqataavoq. Taanna siulersuisuni sulinermi nammatsisuugaluarpoq, aammalu eqqarsaatigilluakkamik kinaassusersiunngitsumillu aalajangiisuusaraluarluni, René Olsen, GBU-p siulersuisuinut tunuarluni allagaqarnermini allappoq.

Pitsaasunik angusaqartitsisoq
René Olsen ukiuni 12-ini GBU-mi inuusuttunut suliaqarnermut attuumassuteqarsimavoq, inuusuttunut nunanut allanut unammisartunut sungiusaasuulluni aamma kingorna inersimasunut sungiusaasuulluni, sulinerminilu kusanartumik ajugaatitsisarluni, AWG-mi sisamanik kuultinnatsitsilluni sølvilu ataaseq, kiisalu Island Gamesimi sølvit marluk aamma futsalimi nunanut allanut unamminerni sisamani ajugaatitsilluni.

Kusanartumik angusaqaraluarluni René Olsen ima naqissusiivoq:

- Maanna siulersuisut namminneq ilaminnik taamatut sumiginnaasunik suleqateqarnissara takorloorsinnaanngilara. Tatiginanngilaq aamma sulisunik aqutsinerlunneruvoq. 

Teklelu pitsaasumik suleqatigiillutik aamma ungasissumut isigisumik Kalaallit Nunaanni isikkammik arsaannerup aamma futsalernerup kivinnissaa siunertaralugu suliniuteqarlutik, René Olsenip tikkuarpaa. 

Piukkunnartunik ineriartortitsineq maqaasissagaa
- Unammisartut inooriaasiannik allanngortitseqataanikuuvugut, sungiusarnernut unamminernullu pimoorussinerunermik, kalaallisut futsalimi ilinniartitsilluta, immikkoortoqarfinni tamani piukkunnaatilinnik katersuutsitsilluta, piukkunnaatilinnik ineriartortitsilluta oqaloqateqarluta aamma unammisartunik pingaarutilinnik ineriartortitseqqilluta, taakkuuppullu maqaasinerpaasassakka, René Olsen ilisimatitsivoq.

Aamma atuaruk: KNAK siulittaasua nunanut allanut sungiusaasoq soraarseriarlugu tunuartoq

- Siulersuisut sulisuminnik sumiginnaanerat nipangiinnarlunga akuerisinnaanngilara, suleqatiga kusanartunik angusarpassuarnik inerisaaqatigisimasara. Tekle tapersersorneqarnissamik pisariaqartitsinerpaaffimminiittoq, siulersuisut sumiginnarpaat. Isikkammik arsaannermik suliaqarneq uummatinnik aallutaraara, kisianni maanna siulersuisut suleqatigisinnaanngilakka, taamatut iliuuseqarnerat eqqarsaatigissagaanni, maanna futsalimi sungiusaasuusimasunngortoq naggasiivoq.

Seneste nyheder / Nutaarsiassat kingulliit