Arctic Winter Games

Futsalimi sukkasuumik unammisut - Frederik utaqqineqartoq

AWG 2016-imi futsalimi unamminerit siulliit timersuummut aamma aliikkusersuinermut isumalluarnartortaqarput

Timersornermik takutitsiniaraanni sisoraaserluni aput kisimi pisiaraqartuunngilaq.

Issittumi arsaattartut nukappiaqqat minutsini makkunani tamanna uppernarsisippaat.

Prinsi utaqqineqartoq
Ataasinngornermi ullaap tungaa tamaat Nuummi timersortarfimmi futsalimi pissanganarluinnartunik unammisoqarpoq.

Unammersuarneq siulleq sioqqullugu, Kalaallit Nunaat aamma Nunavut, kunngissaq Frederimmit isiginnaarneqartussaq, ullormi unammiffiusumi kikkut unammilluarnerpaanersut nalilersorneqarsinnaavoq..

Niviarsiaqqani nukarlerni Alaska aamma Kalaallit Nunaat maannamut nukittunersaagallarput. Taakku marluk Yukon aamma Nunavut annertuumik ajugaaffigaat.

Kalaallit Nunaat siuttuusoq
Taamaattorli niviarsiaqqat nukarliit Yukonimeersut, North West Territoriesimeersut malinnaalluarallarput.

Gruppimi 'intermediate femalemi' unamminerit marluk qaangiuttut Kalaallit Nunaat siuttuuvoq.

Nukappiaqqani juniorini Alaska Yukonimut ajugaareerluni aamma siuttuuvoq. Niviarsiaqqani aamma nukarlerpaani Kalaallit Nunaat siuttuuvoq, Yukonimit malinneqarluni.

Timersortarfimmi pissangasoqartoq
Maanna nukappiaqqat nukarliit pitsaassusaat oqaatigissallu suli nalunarpoq, unamminerit ikitsuinnaat ingerlanneqareermata.

Niviarsiaqqat nukarliit Nunatsinneersut ataasinngornermi ullaap tungaani pissanganartumik Yukonimut unammipput, isiginnaartut arlaleriarlutik nikuittarput.

Nukappiaqqani nukarlerni North West Territories aamma Albertap akornanni unammineq isertitsiffiulaavissorpoq, kisianni 2-2-mik naammassineqarpoq, unamminerup naammassinissaanut minutsit marluinnanngortut målertoqarmat, kinguninngualu periarfissarujussuarmik pissarsigaluarlutik.

Niviarsiaqqani unammineq sakkortooq
Unamminerup taassuma kinguninngua Albertap niviarsiarartaat juniorit North West Territoriesimut unammipput. Taakkununnga illersuisut tassani nipitupput, immaqa nukappiaqqanit unammisunit siuliminnit unamminerat sukkanerummat tunioraaffiulluarnerummallu.

Unamminermi minutsit marluk qaangiuttut målit napasuinik eqquisoqarnera suli nippatsitsivoq. Unamminerlu sakkortunerusoq ersarippoq.

Alberta annguttoq
Minutsit tallimat qaangiuttut North West Territories isertitsipput. Minutsi ataaseq affarlu qaangiuttut aamma isertitseqqillutik.

Minutsit aqqanillit qaangiuttut Alberta isertitsivoq, unamminerullu immikkoortuata aappaani 2-2-mik inissisimapput. Unammineq naammassimmat Alberta 3-2-mik ajugaavoq.

AWG pillugu allaaserisat kingulliit atuakkit:

Inernerit uani malinnaavigisinnaavatit

DMI: Marlunngorpat anorlileqqissaaq

Kunngissap programmiani allannguutit

Powered by Labrador CMS