Frimærkinik saqqummersitsineq: Kalaallit frimærkii pillugit katersisartut siuleriiaattut
Sapaatip akunnerata naanerani Tele-Post qallunaat ukioq manna frimærkinik saqqummersitsinerisa annersaanni peqataavoq.
Katersisartut akornanni frimærkit nutaanerpaat Tele-Postimeersut katersisartut akornanni ukioq manna aammaarlutik nuannarineqaqaat, frimærkinut pisortaq Allan Pertti Frandsen oqarpoq.
- Frimærkiutigut 2018-imeersut tamarmik soqutigineqaqaat. Nerrivigisatta saavani aallaqqaataaniit naanissaata tungaanut tunuleriiaaqqapput pisiniarlutik oqaloqatiginiarlutalu. Pingaartumik Dronningip akvarelimik Kalaallit Nunaannik qalipagai assiliartaralugit frimærkiliat piumaneqaqaat. Frimærkit taakku aprilimi saqqummerput, nioqqutigineqarpullu Foreningen Grønlandske Børnimut iluaqutissanngorlugit, frimærkinut pisortaq tusagassiuutinut nalunaarummi oqarpoq.
2018-imut ukiup mappea nutaaq, ukiumi tassani frimærkiliaasunik imalik tunineqarnerpaasoq, Tele-Post ilisimatitsivoq. Aammattaaq juullip frimærkii tipigissut, Ivínguak’ Stork Høeghimit pilersinneqarsimasut nuannaarutigineqaqalutillu tupaallaatigineqarput.
Alla ornigarneqarluartoq
Tele-Post aammattaaq ornigarneqarluartumik allamik takusassaqartitsivoq.
- Nerrivigisatta ilaani aalisartup Niels Olsvigip Ilulissaneersup frimærkerpassuit katersaatimi ilai soqutiginarluinnartut saqqummersippai. Katersisartut allat, Niels Olsvigip meeraallunili kalaallit frimærkiutaannik katersaataanik takunnittut assorsuaq ajasoortinneqarput.
Ukiumoortumik Frimærkinik, Allakkanik aammalu Postkortinik saqqummersitsinersuarmi Københavnimi pisumi, frimærkinik katersisartut pingaartumik Danmarkimeersut, Tysklandip avannaaneersut aammalu Sverigemeersut naapittarput frimærkiutiminnik taarsiiniarlutik, pisiniarlutik tunisaqarniarlutillu.