Ilulissat

Franskit nunanut allanut ministeriat tikeraassaaq

Frankrigip nunanut allanut ministeria Laurent Fabius danskit nunanut allanut ministeriat Martin Lidegaard peqatigalugu Ilulissanut ullumi aqagulu tikeraassapput. Naalakkersuisoq Vittus Qujaukitsoq aamma peqataassaaq. COP21-mi ataatsimeersuarnissami Parisimi pisussamut tunngatillugu tikeraartoqassaaq

Naalakkersuisoq Vittus Qujaukitsoq danskit nunanut allanut ministeriat Martin Lidegaard peqatigalugu Frankrigip nunanut allanut ministerianut tikilluaqqusissapput

Franskimik ministerimik Kalaallit Nunaat aatsaat tikeraartoqalinngilaq. 1998-mit 2000-ip tungaanut Frankringimi nunanut allanut ministeriusoq Hubert Védrine Nunatsinneereerpoq. Frankrigimi ministerimik kingullermik tikeraartoqarpoq 2007-mi, tassani Jean-Louis Borloo Ilulissaniippoq.

Sila pillugu ataatsimeersuarnissaq Frankrigimit aaqqissuunneqartussaavoq, taamaattumik nunanut allanut ministeri nunanut assigiinngitsunut tikeraaqattaarpoq. Silaannaap allanngoriartornera pillugu oqallinnermi Ilulissat tikinneqanngitsoorsinnaanngilaq.

Issittumi Siunnersuisooqatigiinnut Frankrig malinnaasartuuvoq, Issittumilu sumiiffiit assigiinngitsut maannakkut tikilerpaat. Issittumi Siunnersuisooqatigiiffik pillugu oqallittoqarnissaa taamaattumik tupaallaataanngilaq.

- Issittoq pillugu Frankrigimi soqutiginnittut amerlapput. Issittoq pillugu nalunaarusiat amerlasuut saqqummeriinngikkunik saqqummingajalerput, ph.d.-iullunilu siunnersorti Damien Degeorges oqarpoq.

Kalaallit Nunaat pillugu nalunaarusiaq ‘Le Groenland, un carrefour entre l’Europe et l’Arctique ?’ ilaatigut eqqartorpaa. Nalunaarusiaq André Gattolinimit allanneqarpoq Danmarkimut Nunatsinnullu tikeraarnermini.

Powered by Labrador CMS