Kalaallit Nunaannut ataatsimiititaliaq
Folketingimut ilaasortat Qeqertarsuup Tunuanut Nuummullu angalassapput
Qallunaat politikerit nunatsinni pissutsinik takutinneqarluassapput nunaqarfinnut Royal Greenlandillu ingerlatsiviinut tikeraarlutik
Folketingip Kalaallit Nunaannut Ataatsimiititaliaa ukiumoortumik Nunatsinnut angalassaaq. Ukioq manna Qeqertarsuup Tunuanut Nuummullu angalassapput.
Angalanermi ataatsimiititaliamit peqataassapput kalaallit folketingimut ilaasortat marluk Sara Olsvig Doris Jakobsenilu, kiisall Flemming Mortensen aamma Karin Gaardsted, Socialdemokraatineersut, Annette Vilhelmsen, SF-imeersoq, Christian Juhl aamma Finn Sørensen, Enhedslisten-imeersut, Claus Hjort Frederiksen, Flemming Damgaard Larsen aamma Kim Andersen, Venstre-neersut, Martin Henriksen, Dansk Folkeparti-meersoq aammalu Edmund Joensen, Savalimmiuneersoq angalaqataassalluni.
Ataasinngorpat Ilulissanut timmisartussapput tassanilu borgmester Ole Dorphimnit tikilluaqquneqarlutillu Ilulissat Kangerluat Nunarsuarmilu kingornussaq takuniassavaat. Marlunngornermi Ilimanami Realdania-p suliniutaa takuniassavaat Qasigiannguanilu katersugaasivik inoqarfimmik piviusorpalaartumik suliniutilik, kiisalu Ryoal Greenlandip aalisakkanik suliffissua piulaassavaat. Sara Olsvig Qasigiannguarmiuuvoq, tassani arnaa Anne Mette Olsvig katersugaasivimmi pisortaalluni. Pingasunngornermi Qeqertarsuarmi Arktisk Station pulaassavaat, tassanilu qularnanngitsumik silap pissusiata allanngoriartorneranik pissutilimmik nuna sisoorsimasoq takujumaarpaat. Nunap sisoorneratigut erngup aqqutaa aserorneqarpoq imermillu pilersuineq unitsinneqarluni. Tamatuma saniatigut tikeraarneqassaaq nunaqarfeeraq Kitsissuarsuit, Aasiaat Qeqertarsuullu akornanniittoq. Sisamanngornermi Ilulissani eqqaretuussivik pulaassavaat, tamatumalu kingorna Nuummut timmisartussallutik.
Ilulissani Claus Hjort Frederiksenip, Martin Henriksenip aamma Christian Juhlip angalaqatigiit qimallugit Danmarkimut uterlutik timmisartussapput.
Politikerit Nuummi sisamanngornermi filmfestivalip ammarneqarnera peqataaffigissavaat.
Tallimanngornermi aallartissapput Hans Egedep Illuani Inatsisartunut ilaasortanik ataatsimeeqatiginnillutik.
Tamatuma kingorna pinerluuteqarsimasunut isumaginniffik Politimestereqarfillu pulaarneqassapput. Kingorna saammaasseqatigiinnermut kommissionimi allaffimmi pisortaq Mari Hardenberg aamma Inuussutissarsiornermut, Aatsitassanut Sulisartoqarnermullu Naalakkersuisoqarfik ataatsimeeqatigiissavaat. Unnukkullu ataatsimiititaliami ilaasortat naalagaaffiup kukkunersiuisui ataatsimeeqatigissavaat.
Arfininngorpat Issittumi Sakkutooqarfik pulaarneqassaaq, tamatumani naalagaaffiup kukkunersiuisui peqataassallutik, kiisalu KOmmuneqarfik Sermersooq aamma Godthåb Bryghus pulaarneqassallutik.
Sapaammi ataatsimiitditaliap Kalaallit Nunaanni Eqqartuussivik pulaassavaat suliassallu utaqqisut amerlassusaannik paasissutissinneqassallutik, kiisalu aningaasaqarnermut Naalakkersuisumit Vittus Qujaukitsumi oqalugiarfigineqassapput, tamatumalu saniatigut folketingimi politikerit Grønlandsbankip pisortaa Martin Kviesgaard oqaloqatigissavaat.
Programmimi aatsitassarsioqatigiiffinnik naapitsinissamut piffissaliisoqarsimagunanngilaq, tamatumani aatsitassanik suilniuteqarnermi aporfissat pingaarnerit tassaammata attaveqarnermut aningaasaliissuteqarnissaq.
Ataatsimiitditaliaq ataasinngorpat Københavnimut utissaaq.