akulerutsitsineq
Folketingimut ilaasortat pitsaanerusumik akulerutsitsineq ujartorpaat
Aleqa Hammondip paasiuminaatsippaa qimaasut Danmarkimut pisut akulerutsitsinermut programmimut peqataasinnaammata, qallunaatut ilinniartinneqarlutik inissaqartinneqarlutillu, kalaallit taamatut neqeroorfigineqartoq ajortut
Naalagaaffeqatigiinnermut qinngaqqunnartuuvoq kalaallit Danmarkimiittut affangajaat isummiutiinnakkanik isumaqarfigineqartarnerat, aammalu sulisartoqarnermut attuumassuteqanngippallaarnerat.
Taamatut Berlingskes Politico-mut erseqqissaavoq Siumut tunuliaqutaralugu folketingimut ilaasortaq Aleqa Hammond.
Isiginerlunneqartarput
Taamatut nalunaaruteqarpoq Institut for Menneskerettighederip nalunaarusiaata saqqummersinneqarnerani, tassuuna oqaluttuarineqarluni kalaallit Danmarkimiittut qallunaanit inuiaqatigiinnit qanoq pineqartarnersut.
Istituttip misissuinera naapertorlugu kalaallit Danmarkimiittut 44 procentii isiginerlunneqartarput isummiutiinnakkanillu isumaqarfigineqartarlutik. 53 procentillu isumaqarput Danmarkimi kalaallit ataatsimut isiginerlunneqartartuusut.
Ilanngullugulu kalaalerpassuit Danmarkimi sulisartoqarnermut akulerukkuminaatsitsipput.
Narrunarsaaneq
– Naalagaaffimmi nammineq innuttarisanik narrunarsaaneruvoq immikkoortitsinerullunilu. Unnerluussinerillu ima erloqinartigaat naalakkersuisut kikkulluunniit sumilluunniit tamakkua atuutsittariaqarnagit, Aleqa Haommond Politico-mut oqarpoq, ujartorpaalu kalaallinut innuttaasunut, allamik oqaasilinnut, allaanerusumik kulturilinnut qallunaanillu allaanerusumik tunuliaqutalinnut, akaarinninnerunissaq.
Tamatuma saniatigut kalaallip folketingimut ilaasortap paasiuminaatsippaa qimaasut Danmarkimut pisut akulerutsitsinermut programmini peqataasinnaammata, qallunaat oqaasiinik ilinniartinneqarlutik inissaqartinneqarlutillu, kalaallit taamatut neqeroorfigineqarneq ajortut.
Immikkut iliuuseqarluni
Inuit Ataqatigiit tunuliaqutaralugit folketingimut ilaasortaq Aaja Chemnitz Larsen isumaqarpoq immikkoortitsisoqarsimappat tamanna iliuuseqarfigineqassasoq. Ilanngulluguli eqqaasitsissutigaa Danmarkimi kalaalerpassuaqartoq ingerlalluartunik, taamaattumillu ataatsimut isiginninniartoqartariaqartoq.
– Kalaallit Danmarkimiittut ilaasa, immikkut iliuuseqarfigineqarnissamik pisriaqartitsisut, atugarisaasa nukittorsarnissaannik naalakkersuisut neriorsuutaannik attassiniartissavagut. Ilaatigut oqaatsinik atuartitsinerup nukittorsarneratigut, kajumissitsuminnik sulisut atugarisaasa pitsanngorsarnerisigut minnerunngitsumillu suliassaqartitsiniarluni suliniuteqarneq nukittorsarlugu, Aaja Chemnitz Larsen tusagassiorfinnut nalunaarutikkut erseqqissaavoq.
Aningaasanut inatsit
Folketingimut ilaasortap ajornartorsiut ullumikkut Folketingimi 2016-imut aningaasanut inatsisissatut siunnersuut oqaluuserineqalerpat saqqummiunniarpaa, isumaqarami innuttaasut ilaasa ataatsimooqatigiinnerup avataaniittutut misigisimanerat naalakkersuisut pimooruttariaqaraat.