DK-mi aningaasanut inatsit
Folketingimi ilaasortaq Savalimmiormiu: Anngaaginnartussaalluta maaniinngilagut
Nunanit avannarlerneesuneersut danskit naalakkersuisuinut danskit aningaasanut inatsisissaannut isumaqatiginninniarniarlutik Savalimmiut sinnerlugit Folketingimut ilaasortaq Sjurdur Skaale, JF, aamma IA-mit Johan Lund Olsen oqarput
Danskit aningaasanut inatsisissaat aappaagumoortoq Folketingimi pingajussaa pingasunngornermi oqallisigineqassaaq. Sjurdur Skaale, Javnaðarflokkurinimeersoq oqarpoq, Folketingimi ilaasortaqatiminut erseqqissaavoq anngaaginnartussatut ilaasortaanani. Danskimmi naalakkersuisuutitaat nunani avannarlernit ilaasortaasunit suleqateqartariaqarput aningaasanut inatsit akuersaarneqassappat.
- Aningaasanut inatsimmut taaseqataanngikkutta aqagu, Danmarkimi januaarimi qinersisoqarsimassagaluarpoq, Sjurdur Skaale oqarpoq.
- Soqqusaattuusimasuugutta, piumasagut tamaasa ilanngukkusussimasuugutsigit annertuunik piumasaqarsimassagaluarpugut. Piumasaqaativut danskit akileraartartuinit akilerneqarsimassagaluarput, uagut qinersisivut akiliuteqarsimanavianngikkaluarput, Savalimmiunit Folketingimut ilaasortaq oqarpoq.
Taamaakkaluartoq Sjurdur Skaale nalunaaruteqarpoq aningaasaqarnermut ministerimik ataatsimeeqateqarneq naammagisimaarlugu. Taamaattumik Sjurdur Skaale aningaasanut inatsimmut taaseqataaniarluni oqarpoq.
Inuit Ataqatigiinnit Johan Lund Olsen danskit aningaasanut 2015-mut inatissaannut taaseqataaniarluni aamma oqarpoq. Kalaallit Nunaannili qinersisoqartussaaneranut atatillugu isumaqatiginninniarnerit unitsiinnarneqarnerat akuersaanngilaa.
- Folketingimi partiit allat peqatigalugit oqartussaaqataanngitsuungajappugut. Danskit Folketingimi ilaasortaatitaattut Savalimmiormiut Kalaallit Nunaanniillu ilaasortaasut naligiimmik isigineqartussaapput. Partiigummi danskit partiivisut naleqartigaat, Johan Lund Olsen oqaluttarfimmit oqarpoq.
Siumumi politikkerip Nick Nielsenip aningaasaqarnermut inatsip Folketingimi taasissutigineqarnerani peqataasinnaannginnini pissutigalugu akuerseqataanngitsumut isumaqateqarpoq taaseqataassanatik.
Nunat avannarlernit oqariartuutigineqartut aningaasaqarnermut ministerimit Bjarne Corydonimit qisuariarfigineqanngillat.