Folketingi: Partiit tamaasa ilanngunnissaat sulissutigaarput

Ilumoortoq saneqqutilaarsimavarput sapaatiummat Sermitsiaq.AG-mi oqaluttuarigatsigu Folketingip quppernerani nittartakkami www.ft.dk-mi Kalaallit Nunaat Savalimmiullu ilanngunneqarsimanngitsut. Soorunami ilanngunneqarsimapput. Fane-miunngitsorli Folketingimi partiit tamarmik ilisaritinneqarfianni. Tassani qallunaat partiivi kisimik taaneqarsimapput. (uani takuuk)
Aamma atuaruk: Naak Kalaallit Nunaat Savalimmiullu
– Tamanna web-imi akisussaasunut ingerlateqqissimavara, taava nalilissavaat qupperneq nittartagaq kalaallit savalimmiormiullu partiivinik paasissutissanik ilaneqassanersoq. Aamma taanna suliniummut gruppimut ingerlateqqissimavaara, taassuma maanna sulissutigimmagu folketinget.dk-mi ujaasissutip nutarsarnera. Kiisalu partiit taakkua sisamat attaveqarfigissavagut tusarniarlugu quppernermi nittartakkap suani ilisaritinneqarusunnersut. Immikkoortup Demokrati-p ataani qallunaat partiivi nalunaarsorsimapput, nalunngilaralu tassani partiit atlantikup avannaaniittut ilanngunniarneqartut.
Taamatut paasissutissiivoq Folketingimi attaveqarnermut siunnersorti Finn Tørngren Sørensen.
Taassumali kingorna qupperneq nittartagaq misissorsimavaa sumiiffinnilu arlalinni Kalaallit Nunaat Savalimmiullu nassaarisimallugit.
Ilaatigut ataatsimiititaliat saqqummiussaanni tamani, isumaliutissiissutit ilanngullugit, partiit tamatigut taaneqartarput.
– Atortorlu una atoraanni: Find medlem efter parti, partiit tamarmik drop down menu-mi saqqummertarput. Atortoq una iserfigalugu: Antal medlemmer i partigrupperne, partiit Folketingimut ilaasortanut qinigaasimasunut linkimi taaneqartarput. "Publikationer" ataani "Politiske Partier" ataani partiinut tamanut allattorsimaffimmik linkseqarpoq, tassani atlantikup avannaani partiit ilaallutik. Tassanissaaq "Medlemsfortegnelse efter valgkreds"-imi atlantikup avannaanit parfiit sisamat folketingimullu ilaasortat qinigaasut takuneqarsinnaapput, Finn Tørngren Sørensen paasissutissiivoq.