Foghip Stoltenberg kingoraartissamisut nersualaarpaa

Nato-p generalsekretæriata Anders Fogh Rasmussenip kingoraartissani, Norgemi Arbeiderparti-p siulittaasua ministeriunerusmasorlu Jens Stoltenberg twitter-ikkt nersualaarpaa.
Atorfimmut angut eqqortuuvoq, Fogh isumaqarpoq imatut oqarluni:
´@jensstoleberg Nato-p generalsekretæriatut 2014-imi oktobarip aallaqqaataani kingoraartissattut toqqarneqarneranik qamannga pisumik pilluaqquvara. @jensstoltenberg ukiorpassuarni ilisarisimasimavara, nalunngilaralu Nato-p ataatsimeersuarnerata kingorna Nato-p nukittussusaanik ineriartortitseqqittussatut angut eqqortusoq.´
Nato septembarimi Wales-imi ataatsimeersuarnermini periusissani aalajangersassavai. Tamanna pissaaq pifissmi pissanganartorsiorfiusumi, Ruslandip qeqertaasaq Krim tiguarmagu maannalu Ukraine-p tassani sakkutooqarfii tamaasa nakkutigisarilerlugit. Tamanna peqatigalugu Rusland Ukraine-p kangiani sakkutoorpassuarnik inissiisimavoq.
Anders Fogh Rasmussenip erloqinartorsiorneq tamanna aamma twitter-imi eqqaavaa, tamannalu pissutigalugu Danmark sakkutuut timmisartuinik F-16-inik arfinilinnik maajip aallaqqaataani Letlandimut Litauen-imullu inissiissaaq, baltikum-ip silaannartaanik alapernaarsuisussanik. Tallimassaa qallunaat sakkutuui timmisartortartut Baltikum-imut alapernaarsuiartussapput.
– Ukraine-p Ruslandillu erloqinartorsiornerisa takutippaa Nato-p nukittuumik aalajangiisinnassusilimmillu qullersaqarnissaa suli pisariaqartinneqartoq, Anders Fogh Rasmussen allappoq.*
Stoltenberg Socialdemokratit nunanut allanut tunngasunut oqaaseqartartuanit John Dyrby Paulsenimit nersualaarneqarpoq, Barentshavet pillugu Ruslandimik isumaqatigiissuteqarsimammat. Issittoq nunat taakkua marlu kiisalu Danmarkip/Kalaallit Nunaata, USA-p Canadallu oqartussaaffiginiuppaat uuliaqarsinnaanera gas-eqarsinnaaneralu pissutigalugit.