FN ullorsiornerani: IA suliniutissanik siunnersuuteqarpoq

Naalagaaffiit Peqatigiit meeqqat pisinnaatitaaffii pillugit isumaqatigiissutaa sisamanngornermi ukiunik 25-nngortorsiorpoq.

Sermitsiaq.AG-mi sapaatip akunnerani kingullermi oqaluttuaraarput Meeqqat pillugit Siunnersuisoqatigiit meeqqat pisinnatitaaffimminnik ilisimasaqarnerunissaat 2015-imi sulissutiginiaraat.

Maannalu Inuit Ataqatigiit meeqqat pisinnaatitaaffii pillugit suliniutitigut meeqqat inuusuttullu atugaat qulakkeerniarlugit siunnersuuteqarpoq, aamma Atassutip qineqqusaartitaa Margrethe Kruse Jensen meeqqat atugaat pillugit sammisaqarnerunissatsinnik oqariartuuteqartoq.

Meeqqanik inuusuttunillu ikiuisarnermut inatsisip nutarternera ukiaq manna Inatsisartut ukiaanerani ataatsimiinneranni oqaluuserineqartussaagaluarpoq, qinersisoqarnissaalu peqqutigalugu kinguartinneqarluni.

Allannguutaasussat naammanngillat
Kisianni Inuit Ataqatigiit isumaqarput nutartigassatut siunnersuutaangaluartut naammanngitsut. Taamaattumik Inuit Ataqatigiit maanna
ataatsimoorussatut aaqqiissutissanik siunnersuuteqarput ilaatigut inatsisit allanngortinneqarnissaannik kinguneqartussamik.

- Ukiut 25-it matuma siornatigut Naalagaaffiit Peqatigiit meeqqat pillugit isumaqatigiissutaat pilersinneqarpoq kissaatigaarpullu ukiuni 25-ni tulliuttuni pissutsit pitsanngortinnissaannut siunissaq ungasissoq isigalugu pilersaarusiussasugut, taamaalilluta meeqqat tamarmik pitsaasumik toqqissisimanartumillu peroriartornissaat qulakkeerneqarluni, Inuit Ataqatigiit Inatsisartunut qinigassanngortitaa Aaja Chemnitz Larsen oqarpoq.

Meeqqat amerlavallaat atugarliorput
Inuit Ataqatigiit taama siunnersuuteqarnermikkut susassaqarfimmut tassunga nutaamik periuseqarnissamik oqariartuuteqarput. Suliniutillu eqqunniagaat nunatsinni meeqqanik inuusuttunillu ikiorsiiniarluni sulinermi arlalitsigut kivitseqataasussatut eqqarsaatigineqarput.

- Ukiuni kingullerni misissuinerit takutippaat meeqqat inuusuttullu amerlavallaartut atugarliortut, Inuit Ataqatigiit siulittaasuat Sara Olsvig oqarpoq.

Atassutip aamma eqqumaffiginnittoqarnerunissaa kissaatigaa
Kisianni aamma Atassutip Inatsisartunut qineqqusaartitaa Margrethe Kruse Jenseni isumaqarpoq nunatsinni meeqqat atugaannut eqqumaffiginninnerusariaqartugut.

- Maannakkummi Nunatsinni siusissukkut iliuuseqarnissaraluaq allaannginnami illoq ikuallalereersimasoq qamisarniarneqaannartartoq. Assigiimmik siunertaqaraluarluni anguniagaqaraluarlunilu ataqatigiissumik suleqatigiittoqartannginnera pissutaalluni aamma suliniartussat akornanni akimut oqaloqatigiittoqartannginnera aporfiupput. Sulisussat ikiuuttussallu ikippallaarujussuarput amerlanerusariaqarpullu, pingaartumik kommuunit isumaginnittoqarfiini, Atassutip Inatsisartunut qineqqusaartitaa Margrethe Kruse Jensen oqarpoq.

Suliassat amerlavallaarujussuartut
Margrethe Kruse Jensen aamma isumaqarpoq inunnik isumaginnittoqarfiup iluani sulisut amerlisariaqartut ilutigisaanillu sulinermi atukkat pitsanngortinneqartariaqartut.

- Isumaginninnermi siunnersortit suliassarpassui naammareeqisut ikilisarneqartariaqarput. Ikiortaasalu suliassaat amerlavallaarujussuarput. Isumassugassat ikiorsigassallu allaat inuit 100-t sinnerujussuartarpaat. Kiap suliassaq ilungersunareeqisoq oqimaaqisorlu taamaattoq naammaginartumik naammassisinnaavaa?, Margrethe Kruse Jensen aperaaq.

1992-imilu Kalaallit Nunaat meeqqat pillugit isumaqatigiissummut ilannguppoq, taamalillutillu politikerit meeqqanut inuusuttunullu neriorsuillutik meeqqat pillugit isumaqatigiissut malillugu pisinnaatitaaffiit atuutsinniarlugit.

Nunarput Naalagaaffiit Peqatigiit Meeqqat pillugit Ataatsimiititaliaannit aamma 2016-imi nalilersorfigineqassaaq.

Atuaruk: Meeqqat uku ilisimasaqarfiginerulissavaat