Friday, September 29, 2017 - 10:46

FN-p Kalaaallit Nunaani Danmarkimilu eqqakkat toqunartunik akullit qanoq suliarineqartarnerat misissuiffigaat

Assi.: arkiv
Naalagaaffiit Peqatigiit inuit pisinnaatitaaffiinik ilisimasalimmik Danmarkiliartitsiarniarpoq, tassani eqqakkat navianartut qanoq suliarineqartarnerat misissuiffigineqassalluni. Kalaallit Nunaallu ilanngutissavaa.

2.-miit 13.- oktokber ilanngullugu inuit pisinnaatitaaffiannik ilisimasalik Naalagaaffiit Peqatigiinneersoq, Danmarkimi Kalaallit Nunaanilu eqqakkanik qanoq suliarinnittoqartarnersuq misissuissaaq.

Tamatuma kingorna ilisimasalik, Baskut Tuncak, eqqakkat naviaantillit inuit pisinnaatitaaffiinut sanilliullugu qanoq eqqakkanik suleriaaseqarneq pillugu nalunaarusiuassaaq. Naalagaafiit Peqatigiit tusagassiuutinut nalunaarummi allappoq.

- Qilanaarivara angusarineqarsimasut unammilligassallu aaqqivigineqartussat paasisaqarfigissallugit, Baskut Tuncak oqarpoq.

Baskut Tuncakip danskit Naalakkersuisuisa aallartitaanik Naalakkersuisunillu naapitaqassaaq. Kalaallit Nunaallu immikkut isiginiarpaa.

- Kalaallit Nunaani pissutsit immikkut sammisarissavakka. Aammaattaaq misissuiffigissavara issittumi inuiaqatigiit nunarsuarmi aniatitsinermit eqqugaasut. Taamatullu piiaaviit sakkutooqarfiillu misissuiffigissavakka, taanna oqarpoq.

Ukioq manna Nunanut allanut tungassutilinnut Naalakkersuisuusimasoq, Vittus Qujaukitsoq Naalagaaffiit Peqatigiinnut maalaaruteqarpoq, taamani Danmarki amerikamiut sakkutooqarfiini eqqakkanik suliaqarnermi inuit pisinnaatitaaffiinik unioqqutitsinerarlugu pisuutippaa. Maalaaruteqarnerlu kingorna atorunnaarsinneqarpoq.

Baskut Tuncak danskit naalakkersuisuinit aggersarneqarluni Danmarkimut tikeraassaaq.

Inerniliussanilu 13. oktober saqqummiutissavai.

Seneste nyheder / Nutaarsiassat kingulliit