FN-ip nalunaarusiaa: Amerikamiut eqqagaannik tamanik Danmark saliissaaq

FN-ip inuit pisinnaatitaaffii pillugit immikkut misissuisartuata innersuussutigaa, Nunatsinni amerikamiut sakkutooqarfigisimasaanni naalagaaffik tamakkiisumik saliissasoq - USA aamma ikiiuttariaqarpoq.

Amerikamiut illersornissaqarfiata eqqagaat tamaasa nassaaralugillu peernissaat Danmarkip isumagissavaa. FN-ip inuit pisinnaatitaaffii pillugit immikkut misissuisartuata eqqakkat ulorianartut immikkut samminerini taama innersuussutaa ersaritsigaaq.

Amerikamiut sakkutooqarfiini eqqakkanut tunngatillugu taanna ima innersuussuteqarpoq:

- Sakkutuut eqqagaat kalaallinit innuttaasunit kissaatigineqanngitsut, Danmarkip nanillugillu piiassavai. Naalagaaffiit Peqatigiit akuliunnissamut aamma suliamut tamutumunnga tapersersuinissaat annertuumik kaammattuutigineqarpoq.

FN-imut maalaarut

Nunanut allanut naalakkersuisuusimasup, Vittus Qujaukitsup, amerikamiut sakkutooqarfiinit eqqakkanut tunngatillugu, Danmarkip inuit pisinnaatitaaffiinik unioqqutitsisimasutut nalunaarutiginninnera, FN-ip misissuineranik kinguneqarpoq.

Danmarkimi annertuumik paamitsaanneqarmat - Naalakkersuisut siulittaasuata, Kim Kielsenip nalunaarut taanna utertippaa. Kisianni FN-ip inuit pisinnaatitaaffiinut ataatsimiititaliaa pisariaqarsorinnikkuni nammineq misissuinissamik aallartitsisinnaavoq – taamaalillunilu misissuineq unitsinneqarsinnaanani.

Vittus Qujaukitsup FN-imut nalunaarutiginninnerata kingorna amerikamiut eqqagaasa salinneqarnissaat pillugit Danmark aamma Kalaallit Nunaat isumaqatigiissuteqarnikuupput. Tamatuma saniatigut Camp Centuryp misissuiffigineqarnissaanut isumaqatigiissuteqartoqarpoq. Taakkulu isumaqatigiissutit Baskut Tuncakip ataqqivai, kisianni ammanerusoqarnissaanik ujartuivoq.

- Ukiorpassuarni sulianik matoqqatitsinerup kingorna akerleriissutit annertusiartortinneqarsimasut peerniaraanni ammalluinnarnissaq pingaaruteqarpoq.

Amerikamiut najuunnerat ammasuuffigineqarnissaanut kaammattuineq

Kisianni tassani aamma Nuummi Namminersorlutik Oqartussanut tikkuut sammivoq.

- Sakkutuut nunanit allaneersut najuunnerat pillugu Danmarkip Kalaallit Nunaatalu kalaallit inuiaqatigiit aalajangiinernut akuutinneqarnerat malunnaatilimmik nukittorsartariaqarpaat.

Amerikamiut Nunatsinni mittarfinnut suliniutinut akuunissaminnik nalunaaruteqarnerisa kingorna innersuussut saqqumilaaqqilerpoq – taamaalillunilu amerikamiut Nunatsinniinnerat annertusineqassagunarluni.

Powered by Labrador CMS