FN-ip missingersuusiaa kalerriussaq: Silap pissusianut iliuuseqarnissamut ukiunik 15-nik piffissaqarpugut

Nunarsuup kiatsikkiartornerata kingunerisaanik aaqqiagiinngittoqalernissaanik, kaannersuaqalernissaanik, ulersuarnissaanik qimaasunillu ajornartorsiuteqalernissaanik FN-ip silap pissusia pillugu nalunaarusiaata tallimassaani mianersoqqussuteqareersorlu sapaatip akunnera ataaseq qaangiuttoq silap pissusianik ilisimatuut Berlinimi ataatsimiissapput, oqaluuserissallugu silap pissusiata ulorianartorsiortitsinera qanoq akiorniarneqarsinnaanersoq.
FN-ip silap pissusia pillugu nalunaarusiaata tallimaanut missingersuut AFP-p misissorsimavaa, tassanilu tikkuarneqarpoq aningaasatigut anguneqarsinnaasumik FN-ip anguniagaa, tassa nunarsuup kissatsikkiartornera 2 gradit ataaniissasoq, anguniarneqassasoq. Tamatumunngali ukiunik 15-inik piffissaqarpugut.
´Ilimanartoqarpoq´ anguniagaq anguneqarsinnaassasoq, taamaassappalli CO2-mik aniatitsineq annikillisariaqarpoq nukissamillu atuineq annertuumik allanngortittariaqarluni, ´nunallu tamarmik´ peqataasariaqarput sukkasuumillu iliuuseqarlutik.
Tamanna 2030-mut kinguartinneqassappat unammilligassat annertusissapput, missingersuummi isertuussami kalerriussami allassimavoq.
– Neriuppunga nalunaarusiakkut silap pissusianut politikki nutaamik sammineqaqqilissasoq naalakkersuisunullu misigisaqartitsilluni iliuuseqarnissamut nukingernarsisoq, Bill Hare, isumassarsiortarfimmit Climates Analytics-imeersoq, oqarpoq.
Berlinimi ataatsimeersuarneq ullunik tallimanik sivisussuseqassaaq, tassani paasissutissat isertuussat kalerriunneqarsimasut, pisortatigoortumik sapaatiuppat tullianik tamanut saqqummiunneqartussat, oqallisigineqassallutik.
FN ukiut arfineq-marlukkaarlugit silap pissusianut nalunaarusiortarpoq. Nalunaarusiaq kingulleq nalunaarusiat tallimassaraat, immikkoortunullu pingasunut katersuiffiusumullu agguataarsimalluni.
FN-ip silap pissusia pillugu nalunaarusiaata tallimassaata immikkoortua siulleq siorna septembarimi tamanut saqqummiunneqarpoq.
Tassani ilaatigut inerniliisoqarpoq silap pissusiata allanngoriartornera qularnanngitsumik inunnit pilersinneqarsimasoq. Tamatuma saniatigut nakeriallannartumik allassimavoq sila kissatsikkiartorlunilu immat 1 meteri angullugu qaffakkumaartut.
Nalunaarusiat taakkua pingasut ukiaru nalunaarusiamut ataatsimut katiterneqassapput, taannalu oktobarimi Københavnimi ataatsimeersuarnermi inaarsarneqassaaq.