silap pissusia

FN-ip generalsekretæria: Kalaallit Nunaat pingaarutilimmik inissisimavoq

FN-ip generalsekretæria Ban Ki-moon nunarsuarmi siuttut, nunarsuarmi silap pissusiani unammillernartunut aaqqiissutissanik pimoorussiviusunik saqqummiussinissaannik anguniagaqarnermini Kalaallit Nunaata nuimasumik inissinneqarnissaanik eqqarsaateqarpoq

FN-ip generalsekretæria Ban Ki-moon nunarsuarmi siuttut, nunarsuarmi silap pissusiani unammillernartunut aaqqiissutissanik pimoorussiviusunik saqqummiussinissaannik anguniagaqarnermini Kalaallit Nunaata nuimasumik inissinneqarnissaanik eqqarsaateqarpoq. Kalaallit Nunaanni silap pissusiata allannguutaannut atatillugu misilittakkat, nunarsuarmi silap pissusianut suliniuteqarnissamik pisariaqartitsisoqarnerata aallunneqarneranut tapertaanissaat generalsekretærip naatsorsuutigaa.
Avatangiisinut Pinngortitamullu Naalakkersuisup FN-ip ”Kikkut tamarmik nungusaataanngitsumik nukissiuuteqarnissaat” (SE4ALL-imik taagorneqartumut) pillugu suliniuteqarneranut ,juunip ulluisa sisamaanniit arfernanut FN-ip qullersaqarfiani ingerlanneqartumut atatillugu Ban Ki-moon New York-imi naapimmagu tamanna oqariartuutaavoq.
Naak Kalaallit Nunaata avannaani Ban Ki-moon-ip marsimi ulluni marlunni tikeraarnerani issi sakkortugaluartoq, generalsekretærip tikeraarnini asseqanngilluinnartutut, qaqugumulluunniillu puigugassarinngisamisut oqaatigaa. Ban Ki-moon Kim Kielsenimik ataatsimeeqateqarnermini erseqqissaavoq, Kalaallit Nunaata nunarsuup kissakkiartornerani misilittagai pingaaruteqarmata, nunarsuarmioqataasut tusaaniartariaqartut ilinniarfigisariaqaraallu.
Nunarsuarmi naalagaaffiit siuttui ukioq manna septembarip ulluisa 23-anni silap pissusia pillugu ataatsimeersuarnermi, aammattaaq FN-ip qullersaqarfiani ingerlanneqartussami, Naalakkersuisut siulittaasuata Aleqa Hammondip oqalugiarfissaani tamatumunnga periarfissaqarluassapput. Aammattaaq generalsekretæri erseqqissaavoq, nunat gassinik, silaannarmik kissakkiartortitsisartunik annertuumik aniatitsisuusut ataatsimiinnermi tassani anguniakkaminnik pimoorussiffiusunik, gassit silaannarmik kissakkiartortitsisartut silaannarmiittut patajaallinissaannut iluaqutaasussanik saqqummiussinissaat naatsorsuutigalugu.
Kim Kielsenip Ban Ki-moon-imik ataatsimeeqateqarnermi saniatigut New York-imi ”Kikkut tamarmik nungusaataanngitsumik nukissiuuteqarnissaat” pillugu oqallinnermi oqalugiarnissamut periarfissaqarnermini arlalinni, Kalaallit Nunaata nukissiuutinut ataavartunut misilittagaasa, kiisalu Kalaallit Nunaanni nukissiuuteqarnermi immikkut ittumik unammilligassaasa suunerisa aallunneqarnissaat iluatsippaa.
Kim Kielsenip ilisimasallit oqallinneranni erseqqissarpaa, kikkut tamarmik mingutsitsinngitsunik nukissiuuteqarnissaat peqqissutsimi, ilinniartitaanermi, piitsuunermik akiuiniarnermi inuunermilu atugassarititaasunik pitsanngorsaanermi anguniakkat annertunerusut tapersernissaannut pingaaruteqartut.
”Kikkut tamarmik nungusaataanngitsumik nukissiuuteqarnissaat” pillugu oqalliffimmi nunarsuarmi nukissiuutinik nungusaataanngitsunik atuisinnaanerup annertusineqarnissaanut, nukissiuutinik pitsanngorsaanerup pitsaanerulersinneqarnissaanut aammalu nunarsuaq tamakkerlugu nukissiuutit ataavartut marloriaatinngortinneqarnissaannut anguniakkat taperserneqarnissaat pingaarnertut siunertarineqarpoq.

Powered by Labrador CMS