Finskit juullip inuat nunarsuaq tamakkerlugu ilisimaneqarusuppoq
Nunatta juullip inua unammillerneqarpoq. Finskit Santa Claus-iat ukioq kaajallallugu ussassaarutigineqartassaaq
Nioqqutissap meqqia ´Juullip Inua´ pitsaalluinnartuuvoq. Ukiumut sapaatit akunnerini sisamani. Tamanna naammanngilaq, Finlandimiut juullip inuat isumaqarpoq.
Ingerlatsiviup, Finlandimi juullip inuanik nittarsaassinissamik pisinnaatitaaffinnik piginnittup, Santa Claus-ip pisortaata Petri Paarnio-p meeqqat ukioq kaajallallugu nuannaartittarniarpai, aningaasarsiorfiginiarlugit. Kinamiullu aallarniutigineqassapput. Tassami nuna taanna aningaasarsiorfiusinnaasorujussuuvoq. Isumassarsiarlu finlandimiut inatsisartuinit isumaqatigineqarpoq, finskillu juullip inuata Kinami nittarsaannissaanut 1 million koruunit missarpiaannik aningaasaliisimallutik.
Taamatut allappoq GlobalPost.
Aamma atuaruk: Juullip Inuata pii pilerngunneqarput
Finskit juullip inuata nittarsaannissaa ajornannginnerulersimavoq finlandimiut timmisartortitseqatigiiffiisa Helsinki-mit Asiamut timmisartuussisarnitik amerlisimammatigit. Finlandimi neriuutigineqarpoq Santa Claus-ip kangiani ussassaarutigineqarnera millionerpassuarnik isertitsissutaassasoq.