Angalaneq kingulleq
Finn Lynge Qassiarsummi ilisaavoq
Ilisineq allaanerusoq ilisaasup nammineq aaqqissuussimasaa
Finn Lynge Qassiarsummi illerfimmini sungaartumi ilisaammat sila nilleqaaq.
Illerfia politiit angallataannik Sisak III-mik Qaqortumiit umiarsuaanneqarpoq, Qassiarsummullu tikiunneqarmat illerfik Tjodhildurip oqaluffianut sanaqqinneqarsimasumut qummukaanneqarpoq, tassanilu ilisisuuvoq Fader Christian Nouval, Københavnimeersoq.
Ilisinermi najuupput naalagaaffiup sinniisua Michala Engel, Namminersorlutik Oqartussani protokolchef Jakob Rhomann Hard, Inatsisartut sinnerlugit Kalistat Lund, ICC sinnerlugu Aqqaluk Lynge aamma borgmester Jøgen Wæver Johansen.
Tamakkua saniatigut soorunami ilaqutarpassuit ikinnguterpassuilu.
Qaqortumi angutit erinarsoqatigiit Saqaasik oqaluffimmi iliveqarfimmilu tussiarput.
Finnip uillarnera Rie Oldenburg oqaluttuarpoq Finniip ilisaanissani tamaat nammineq pilersaarusiorsimagaa.
Ilaatigut tussiutit atorneqartussat nammineq toqqarsimavai. Taakkua tassaapput: ´Har hånd du lagt på herren lov´, ´Her vil ties, her vil bies´, ´Jeg ved en dejlig have´ aamma ´En rose så jeg skyde´. Aamma aalajangersimavaa illerfik sungaartumik qalipaateqassasoq.
Oqalugiartoq siulleq tassaavoq Qassiarsummiu ajoqi soraarneq 87-inik ukiulik Erik Røde Frederiksen.
Taassuma Finnilu ikinngutigiinnertik oqaluttuaraa, iluamik aallartissimasoq oqaluffik sanaqqillugu aallartinneqarmat:
– Kingorna amerlasooriarluta sivisuumik oqaloqatigiittarsimavugut, minnerunngitsumik Finni aperimmat nunaqarfimmi ilisaasinnaanerluni. Tamanna akueraarput neriorsorparpullu ilerra paarilluarumaarlutigu, Erik Røde oqarpoq, tamatumalu kingorna tussiut, Finnip nunaqarfimmik ikinnguteqarneranut takussutissaasoq, atuarpaa.
Tamatuma kingorna oqalugiarput Kalistat Lund, Aqqaluk Lynge aamma bygderådip siulittaasua Mouritz Karlsen.
Kingorna qallunaatsiaat illorsuanni Eriup Aappalaartup nalaaneersumi kaffisorlunilu tamuluttoqarpoq.