Finn Lynge ataqqinaammik doktorinngortinneqarpoq

Ilisimatusarfiup ukiumoortumik nalliuttorsiornera tallimanngormat ullaap tungaani Finn Lynge Kalaallit Nunaata Universitetiani ataqqinaammik doktorinngortinneqarpoq.
Finn Lyngemik ilisarititsilluni oqalugiarnermini lektor, dr. phil. Thorkild Kjærgaard oqarpoq Finn Lynge 1900-ukkut qiteqqunneranniilli Nunatta iluani avataanilu inuit malunnaateqarnerpaat ilagisimagaat.
– Oqaluttuarisaanermut ilaaginnarumanngilaq, qafffasinnerusumiikkusuppoq oqaluttuarisaanermik allaaserinniffiuinnanngitsumi, oqaluttuarisaanermilli pilersitsiffiusumi. Tamannalu angusimavaa, Thorkild Kjærgaard ilaatigut oqarpoq.
Ukiorpassuarni nunani allani najugaqareersimalluni Finn Lynge 1963-imi Nunatsinnut uterpoq katuullit palasiattut isumaginninnermillu sulisutut. 1974-imi ingerlatsilluaqaluni KNR-mi pisortanngorpoq, 1979-imi Strasbourg-imi Europa-Parlamentimi Kalaallit Nunaat sinnerlugu ilaasortanngornisssami tungaanut.
Ukiuni Strasbourg-imeereernermi kingorna ukiuni arlalinni Københavnimi qaffasissumik atorfeqarpoq, 1998-imiit 2003-mut, taamanikkut namminersornerullutik oqartussani. Suliniutaa annertooq kingulleq oqluttuarisaanermik pilersitseqataasoq tassaavoq Kalaallit Nunaanni Namminersornermut Kommissionimi ilaasortaanera, taassumalu suliaa 2009-mi juunip 12-ianni Namminersorlutik Oqartussanut inatsimmik kinguneqarpoq.
Finn Lynge Ilisimatusarfimmi ataqqinaammik doktorinngortinneqartut sisamassaraaat.
Siusinnerusukkut ataqqinaammik doktorinngortinneqarput Robert Petersen, Michael Hauser aamma Henrik Wilhjelm.
Universitetimi ilinniagaqartut sulisullu saniatigut ataqqinaammik doktorinngortitsinermi peqataapput namminersorlutik oqartussat, Kommuneqarfik Sermersuup, inuussutissarsiortut qanimullu suleqatigisat allat sinniisui peqataapput.
Sermitsiaq.AG-p kingusinnerusukkut assit saqqummiutissavai