Pituffik
Finans: USA-p Danmarki Pituffik pillugu ilalinngilaa
USA-p Danmarkimi aallartitaqarfianit oqaatigineqarpoq Pituffimmi kiffartuussinissamut isumaqatigiissummut isumaqatigiinnginneq politikkimut tunnganani inatsisinut tunngasoq
Nunanut allanut ministerip, Radikale Venstreneersup Martin Lidegaardip, Pituffimmi kiffartuussinissamut suliariumannittussarsiornerup atorunnaarsinnissaanut piumasaqarnera USA-mit ilalerneqarumaartoq ilimanarunnaarpoq.
Taama Finans, amerikamiut Københavnimi aallartitaqarfiata oqaaseqartartua Gavin Sundwallip oqaaseqareerneratigut, allappoq.
- Kiffartuussinissamut suliariumannittussarsiornitsinni ammasumik periuseqarnitta pisariaqalersippaa amerikamiut eqqartuussiviisa kisimik aalajangiivigisinnaagaat Pituffimmi kiffartuussinissamut suliariumannittussarsiornermi arlaatigut ajornartorsiuteqarsimappat, taanna taama Finansimut oqarpoq.
Pituffimmi kiffartuussinissamut isumaqatigiissut aningaasarpassuarnik naleqartoq amerikamiunit Vetrusimit, Exelis Services A/S-imik piginnittunit, ajugaaffigineqarpoq.
Atuaruk: Ministerip Pituffimmut suliariumannittussarsiornermut suliaq USA-mut unitsikkallaquaa
Atuaruk: Dansk Industri: Pituffimmut isumaqatigiissut maanna atuuttoq sivitsorli
Danmarkip, Kalaallit Nunaata USA-llu 2013-imi qaammatini arlalinni isumaqatiginniutigivaat isumaqatigiissutip qallunaat imaluunniit kalaallit suliffeqarfiinut, illersornissamut inatsisit 1950-kkunneersut najoqqutaralugit, tunniunneqarnissaa.
Isumaqatigiissut septembarip naaneranit atuutilissaaq ukiunilu arfineq marlunni atuutissalluni. Isumaqatigiissut katillugit 2,4 milliarder koruuninik naleqarpoq.
Finansip paasissutissat pissarsiarisimasai naapertorlugut amerikamiut illersornissamut ministeriaqarfianeersut aamma danskit USA-mi Washingtonimi aallartitaqarfianeersut, amerikamiut nalunaaqutaat naapertorlugu tallimanngornermi ullaap tungaani naapeqatigiissapput.
Tamatuma kingorna amerikamiut silaannakkut illersornissamut sakkutooqarfiat, kiffartuussinissamut suliariumannittussarsiornermut akisussaasuusoq, isumaqatigiissut pillugu avammut nalunaaruteqarumaartoq oqaatigineqarpoq.
Pituffik pillugu allaaserisat allat uani atuakkit