aningaasaliissutit

Filmiliortartoq naalakkersuisumit immikkut aningaasaliiffigineqarluarpoq

Juullimi meeqqat inersimasullu akornanni tunissutit nuannaarutaasarput. Maannalu kulturikkut suliniutinut 28-nut assigiinngitsunut 2 millionit koruuninik agguaasoqarpoq. Inuk ataaseq immikkut ittumik annertuumik juullimut tunissutisivoq.

Filmiliornermi ilitsersuisoq Nina Paninnguaq Skydsbjerg Jacobsen filmiliornermik suliniutinut sisamanut aningaasaliiffigineqarpoq, taamaalillunilu 564.000 koruuninik pissarsilluni.

Filmiliortartoq Nina Paninnguaq Skydsbjerg Jacobsen aningaasaliiffigineqarnerpaavoq, taanna suliniutinut assigiinngitsunut sisamanut qinnuteqarluni ulapissimavoq, taamaalillunilu katillugu 564.000 koruuninik aningaasaliissutinik pissarsivoq. Aningaasat taakku aningaasaliissutissat sisamararterutingajaraat.

Agguaaneq
Tunissuteqartoq tassaavoq Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq, Doris J. Jensen, taassuma aningaasaliissutit immikkoortunut sisamanut agguaasimavai - katillugit 2.189.672 koruunit.

Eqqumiitsunilianik isiginnaagassianillu saqqummersitsinerit 735.000 koruuninnapput, taakku suliniutinut assigiinngitsunut arfineq-pingasunut agguarneqassapput.

  • Kunstudstillinger og teaterforestillinger fik 735.000 kroner, der skal fordeles til otte forskellige projekter.
  • Filmiliornermik suliallit suliniutinut qulingiluanut 955.000 koruuninnapput – annermik piviusuusaartitsinermut aamma pisimasunik tunngavilinnut.
  • Atuakkiortut atuakkianut assigiinngitsunut pingasunut 148.900 koruuninik pissarsipput.
  • Eqqumiitsuliortunut sulinermut aningaasaliissutit arfineq-marluk tunniunneqarput.

Kulturimut aningaasaliissutinik pissarsisut tamaasa takukkit

Qinnuteqaatit 55-t - 28-t iluatsitsisut
Kulturimut siunnersortip Mika Lyberthip agguaassineq aamma Nina Paninnguaq Skydsbjerg Jacobsenip taama amerlatigisunik pissarsiaqarneranut pissutaasoq nassuiaateqarfigai, taanna kisimiilluni suliffeqarfimmik ingerlatsisuugami aamma aningaasaliissutit inuppassuarnut allanut, filmiliorluni suliniutinut assigiinngitsunut atorneqartussaammata.

- Ilaasa qinnuteqaatigisatik pissarsiaraat, ilaallu minnerusumik pipput, Mika Lyberth ilisimatitsivoq, suliniutit 28-t qinnuteqaatinit 55-iusunit pissarsisimasut taassuma oqaluttuaraa.

Tulliani qinnuteqarfissaq
Qinnuteqarnissap tullianut piffissaliussaq ulloq kingulleq tassaavoq 1. februar 2018. Namminersorlutik Oqartussaniit Kulturimut aningaasaliissutit pillugit sukumiinerusumik paasissutissanik pissarsiniartoqarsinnaavoq nittartakkakkut www.sullissivik.gl-ikkut, kultureqarnermut naalakkersuisoqarfik tusagassiuutinut nalunaarummi taama ilisimatitsivoq.

Powered by Labrador CMS