Tasiilaq
Filmi angajoqqaajussusermut tunngasunut ukkatarisitseqataavoq
Ilinniartitsissutigalugu angajoqqaajussusermut tunngasoq filmi 'Ikioqatigiitta?/Skal vi følges ad?' Tasiilami meeqqanut sullissisunut katersoqatigiisitsivoq
Angajoqqaanngorlaajulluni nuannersut unamminartullu takkuttarput. Meeqqerisut, isumaginninnermut siunnersortit, peqqinnissaqarfimmi sulisut ilinniartitsisullu 56-it Tasiilami sisamanngornermi septemberip arfineq-pingajuani filmimik takutitsinermi suleqatigiinnermilu naapissapput.
Ullormi tassani anguniarneqarpoq qanoq ililluni angajoqqaanngorlaat anaanatut ataatatullu inissisimasut ikiorneqarsinnaassanersut.
Unammilligassat
Peqatigiiffik Kalaallit Meerartaanni meeqqanut sulianut siunnersortitut sulisoq, Helle Skriver, tusagassiuutinut nalunaarummi oqarpoq, ammaneq oqaloqatigiinnerlu sammisassani pingaarnersaasut.
- Kialluunniit meerartaaqqammersoq meeqqamut akisussaanerup unamminartortai kisermaatissanngilai. Ikiorneqarsinnaapput, tassalu filmip taanna oqariartuutigaa, Helle Skriver erseqqissaavoq.
Oqaloqatigiisitsisinnaasoq
Suliamut tunngasunut Qaqortumi sulisut ilagalugit filmi pilersinneqarsimavoq, kalaallisullu oqaasertalinnik ilinniartitsissutinik amigaateqartartut tunngavigalugit sananeqarsimalluni.
Angajoqqaanngorlaajunermut oqaloqatigiisitsisinnaammat - assersuutigalugu ilaqutariinnut sullissivinni aamma inunnik ikiuinermi ingerlatsivinni, meeqqerivinni angajoqqaanut ataatsimiisitsinerni atuarfinnilu.
Soqutigineqarluartoq
Filmi angajoqqaanngorlaatut unamminartut pillugit oqaluunnissamut ammarsaavoq.
Sulisut 56-it suleqatigiinnissamut ilanngussimapput. Tasiilameersut, kisianni aamma Kulusummiit, Kuummiunit, Tiniteqilaamit, Sermiligaamit aamma Isortumiit aggersimapput.
- Angajoqqaatut inissisimanerup soqutigineqarnera oqaluuserineqarneralu malugisinnaavarput, nuannaarutigaarpullu filmip taamatut suliatsinnut tapersiisinnaanera, Helle Skriver oqarpoq.