video takuu
Filmeeraliat nutaat nuannarineqarluartut
Filmeeqqat nutaat arlallit Danmarkimi ilinniarusuttunut ilinniartunullu takusassiat, pingasunngornermi Københavnimi Kalaallit Illuutaanni takutinneqarmata inoqarluarpoq
Inuit 70-it missaaniittut ilinniartuunerusut pingasunngornermi filmeeqqat pingasut ataatsimut qulequtaqartut 'Uninnak Sungiussiartuaarit - Fald til i stedet for at falde fra' saqqummiunneqarnerat takuniarlugu, Københavnimi Kalaallit Illuutaannukarput.
Filmini tikkuartuisoqanngilaq, kisianni Danmarkimi ilinniartutut nunami allaanermik kultureqartumi aamma oqaaseqartumi ilinniarnerminni misigissusaannik oqaluttuarput.
Siammarterneqassasut
Filmit KNR-imi, filmertarfinni ussassaarutitut aamma Piareersarfinni, Nunatsinnilu GUX-ini aamma højskolini takutinneqassapput.
Danmarkimi ilinnialertussat misigissutsimikkut suut piareersimaffigissaneraat oqariartuutaavoq.
Atuaruk: Aalborgimi Kalaallit Illuat qeqqanut nuuppoq
Filmit inuit attaveqaqatigiittarfiini siammarterneqarluarput, misigissutsitigullu qisuariartitsipput.
Nuunnissamut oqallinneq
Takutitseqqaartoqarnerani isiginnaartut filminilu peqataasut pingasut oqallipput, sammisallu itisilerneqarput, najuuttullu nammineq misigisimasatik oqaluttuarinissaannut periarfissinneqarput.
Oqallinnermut peqataapput Niina Petersen, Aki-Matilda Høegh-Dam, Hendrik Lyberth aamma filmimik pilersitsisut marluk, Emile Hertling Péronard aamma Jakob Søvndahl Skovaa Ánorák Filmimeersut.
Atuaruk: 44 procentit danskinit immikkoortinneqarlutik misigisimapput
Filmit Ánorák Filmimit Kalaallit Illuutaannut suliaapput, Namminersorlutik Oqartussanit aningaasanik tapiiffigineqarput.
Allaaserisap ataani assit aamma filmit takukkit