Filippinerit ikiorumaneqarluarput

Nuummi neriniartarfik Bone´s arfininngormat aalajangermat kaaviiaartitani tamaasa Filippinerini ajunaarnersuarmi eqqortuneqartunut tunniunniarlugit ulloq naallugu neriniartarfik ornigarneqartuarpoq.
Filippinerini ajornartorsiortut, qanittukkut anorersuarnik ulussaarsuarnillu eqqorneqartut ikiorumaneqarluarput, ilaqutariit neriniartarfiat Bone´s arfininngormat nalunaaruteqarmat kaaviiaartitani tamaasa siunertamut tamatumunnga atorniarlugit.
Piginnittorlu Erik Brogaard, aamma suleqataavoq. Taassuma nuannaarutigaa pilersuisunilu H.J. Hansen Vin aamma Faxed Kondi peqatigalugit taamatut ikiuussinnaagami.
– Aamma sulisukka ataqqilluinnarpakka ullumikkut akissarsiaqaratik sulisut siunertamut pitsaasumut tapersersuiumallutik, Erik Brogaard oqarpoq.
– Ulloq taanna Bone´s atorluarneqartorujussuuvoq. Neriniartartik eqqarsaatigalugu, tassunga amerlasuut online-kut Bones.gl nerrivissaminnik inniminniisarlutik. Aammattaarli Take Away atorluarneqartorujussuuvoq.
Atuaruk "Nerigit, imerit - Filippinerillu ikiorlugit"
Taamatut katersuiniartoq tassaammat Bone´s tamanna pissusissamisoortorujussuuvoq. Neriniartarfimmi sulisut arfineq-pingasuniit qulingiluannut Filippinerineersuupput, arlallillu ilaqutaqarput ilisarisimasaqarlutilluunniit ajunaarnersuarmik eqqorneqartunik. Taamaattumik sulisunut pingaarutilerujussuuvoq nunagisamik maanna ajornartorsiortup ikiorsinnaanissaa.
– Qujamasuutigisorujussuuvara ullumi maani nererusussimagassi. Takorloorsinnaanngilarsi tamanna nunagisannut qanoq assigiinngisitsitiginersoq. Qujanaq, qujanarsuaq, sulisut pisortaat filippinerimiu saqisorlu Zara Catalan Sermitsiaq.AG neriniartarfimmit anilermat inussiarnisaarluni qujamasoqalunilu oqarpoq.
Erik Brogaardip oqaatigaa tusagassiorfinnut tamanut nalunaaruteqarumaarluni kaaviiaartitat kisinneqareerpata.