Akisuanerit Festival

Festivalimi nuannarineqarluartumi tusaamasarpassuit

Ukioq manna Akisuanerit Festivalimi nipilersortussat siulliit maanna saqqummiunneqalereerput - ullorsiutinilu nalunaaqutsiinissamut pissutissaqarluinnarpoq

Qallunaat nipilersoqatigiit Outlandish pingaarnertut tusarnaartitsisut ilagissavaat

Akisuanerit Festival 2016-imi nipilersortussat marluk siulliit aqqi maanna saqqummiunneqareerput. Festivali ulluni oktoberip 7-anit 9-anut pisussaq, ukioq manna qallunaanik tusaamasanik marlunnik pingaarnertut nipilersortoqassaaq. Tassani Outlandish aamma Christopher pineqarput.

Atuaruk: Akisuanerit Festivalimi nipilersortussat saqqummiunneqarput

Hip Hop Nuummut
Atlantic Musicip nuannaarutigeqalugu ukiamut nipilersoqatigiit Outlandish Nuummut tikilluaqqussavaat. Nunasisut rap/hip hopimik nipilersortartut, erinnanik nuannarineqarluartunik soorlu Aisha aamma Guantanamo aamma Nuummi nuannatsitsissapput.

Nipilersoqatigiit nuuteeraq saqqummersitaat kingulleq 'Warrier / / Worrier' 2012-imi saqqummerpoq. Nipilersoqatigiillu erinarsortuat, Isam Bachiri, aamma kisimiilluni Isam B. taaguutigalugu arlalinnik nuutiliornikuuvoq, nuuteeqqami 'Institution'-mi qallunaat atugaat nuannarineqarluartut atorpai.

Niviarsiaqqat nuannarisaat
Festevalip pingaarnertut nipilersortussaata aappaanut, Christopherimut, tusarnaariat arnaanerusut qilanaarutissaqarnerupput.

Taanna saqqummersitseqqammerpoq, apriilip 15-ani nuuteeraliami pingajussaat 'Closer' saqqummersippaa. Tassani single 'Limousine' kuultinnareersoq tusaaneqarsinnaavoq.

2011-imi nipilesortalernerminit Christopher arlalinnik akissarsinikuuvoq, aammalu tv-ikkut aallakaatitassianut arlalinnut peqataasarluni. Nuummilu qularnanngitsumik erinnat 'I told you so', 'Tulips' aamma 'CPH Girls' appippagit festertoqassaaq.

Programmip sinnera
Festivalip programmissaata sinnera suli saqqummiunneqanngilaq, kisianni qularnanngitsumik kalaallit nipilersortartut nuannersut programmimut ilaajumaarput. Pisarneq malillugu festivali nunanit allaneersunit/qallunaanik tusaamasanik nipilersortoqartarpoq aammalu kalaallinik ukiumit ukiumut allanngorartumik nipilersortoqartarluni.

Bilitsit pilerngunneqartut
Bilitsit pisiassanngorpata piareersimasariaqarpoq. Misilittakkammi naapertorlugit festivalimut isernissaq pilernguffiusarpoq.

Aaqqissuisut Atlantic Musicip tamanna assut nuannaarutigaat. Nipilersuutaarniarfiup siorna Akisuanerit Festivalertoqarnerani ukiuni 25-ini nalliuttorsiornini malunnartippaa. Taanna aappariinnit Marianne aamma Ejvind Elsnerimit ernerinillu Frederik aamma Christian Elsnerimit ingerlanneqarpoq, taakku aamma Nanookimi nipilersortartuupput.

Atuaruk: Akisuaneq Festivalimit assit nuannivissut

Powered by Labrador CMS