Festival: Arctic Sounds ukiut tallimassaannik ingerlanneqartoq

Nipilersortussat 56-it nunanit assigiinngitsunit tallimaneersut tikittut kollegiani, inissaqartitsisuni aammalu suliffeqarfiit inissiaataani najugaqassapput, illoqarfimmilu sumiiffinni assigiinngitsorpassuarni 30-t sinnerlugit tusarnaartitsissallutik.

Metal/rockimik nipilersortartut nunaqarfimmi Upernaviup eqqaani Kangersuatsiaameersut Pukuut festivalimik ammaasuupput.

Ullut tallimat tusarnaatitsinernik, ataatsimiinnernik, workshopsinik, takornarianernik namminerlu piumassutsimik akunnerpassuanik sulinernik imalik festivali ullumi aallartippoq, Sisimiuni Taseralimmi ammaanersiorlutik Vibeke Falden, AFT Pukuukkullu tusarnaartitsillutik aallarniimmata.

- Festivalimi nipilersortut aallartinnginnerani assigiinngitsorpassuarnik pilersaaruteqarpugut, assersuutigalugu nipilersortartunut workshopertitsinerit, NORDIC PLAYGROUNDS-inik taaneqartuni nipilersortartut suleqatigiillutik nipilersuusiorfigeqatigiinnissaannik sinaakkusiisoq., ataatsimoornerit, festivaliniit allanit takkuttunik naapeqatigiinnerit nipilersuusiat siaruartitsinissamik periarfissiisut, aaqqissuisut tusagassiuutinut nalunaarummi ilisimatitsipput.

Suleqatigiinneq annertooq

Festivali suleqateqarpoq peqatigiiffinnik suliffeqarfinnillu assigiinngitsunik, KNR aallakaatitsisassaaq toqqaannartumik appisimaartunik, taakkua KNR2-kut takuneqarsinnaajumaarput, NAPA ikiuuteqataavoq pr-nik nutaarsiassalerinernullu, Arctic Umiaq Line angallassissaaq nipilersortartunik aammattaaq tusarnaarianik nuummiik maniitsumiik kangaamiuniillu, aammalu Radio Tusaataat festivali pillugu ullut tamaasa aallakaatitsisassalluni.

Kajumissutsimik sulisunik aaqqissuunneqartoq

Ukioq manna ikiuuttut 80-it ulapputissapput nerisitsinermik, sceneliornermi, nipilersortartunut sammisaqartitsinermi, allarpassuarnilu aamma ikiuutissapput.

Arctic Sound Sisimiuni pilersinneqarpoq 2014-imi, ukioq manna 29. marts 2. april tungaanut ingerlanneqassaaq, aaqqissuussarlu kajumissutsimik ikiuuttunik napatinneqarpoq.

Arctic Sounds festivalip programmia tamaat uani nittartagaanni takuuk.

Powered by Labrador CMS