Facebookimi oqallinneq: Kalaallisut oqaatsivut ilinniarniarsigit

- Paasisinnaanngilluinnarpara kalaallit danskisut oqaasillit tamaani tikilluaqqusaanngitsutut misigalutik meerujunnerat.

Taama isummertoqarsimanera Facebookimi atuisut ingerlaarteqqeqattaarpaat.

Kalaallit danskisut oqaasillit oqaasitsinnik ilinniaqqullugit Najaaraq Müllerip kaammattuinera oqallinnermik aallaaveqarpoq.

'Pingaartinneqarlutik inunngorsimasut'

- Nunatsinni ataqqineqartussanngorlugit inunngorsimapput: sooq qaavatigut piumasaqaqqissappat?! Oqaatsivut ilinniarniarsigit!!!, Najaaraq Müller allappoq.

Taassuma assigiinngitsunik kalaallit danskisut oqaasillit salliutinneqartussanngorlugit inunngorsimanerat pillugu ima assersuuteqarpoq:

• Oqaatsitsik atorsinnaavaat
• Ilinniarnertuunngorniarfinni kalaallisoornermi qaffasissuseq sorliussanersoq nammineq aalajagersinnaavaat - uagulli kalaallisut oqaaseqartuusugut taama toqqangassinneqanngilagut!
• Ilinniagaqarnissaminnut periarfissagissaarnerupput
• Nunatsinnilu qaffasissumik atorfinittarnerat kingunerisarpaa
• Oqaatsivut piffissaajaataannartut isigingamikkit ilinniarusunneq ajorpaat
• Ataatsimiinnerni danskisuinnaq oqaasilik ataaseq peqataapput SINNERI danskisut oqaloqqusaasarput, illit pillutit!

Ataqqinninnginneq

Kalaallit danskisut oqaasillit oqaatsitsinnik ilinniarusunnginnerat ataqqinninnginnerusoq isumaqarpoq.

- Uagutsinnut danskisut oqalulluarsinnaanngitsunut ilinniarfimmi sukataarnerusariaqartartuusunut ataqqinninnginnerulluinnarpoq! Ilissimi akeqanngitsumik oqaatsivut ilinniariaannaavasi ilissilu pillusi ilaatigut naammagittaalliortarnerput meeriuutiginagu ataqqinninnerulerniaritsi, Najaaraq Müller allappoq.

Sammisaq pillugu illit qanoq isumaqarpit? Kalaallit danskisut oqaasillit oqaatsivut ilinniartariaqarpaat? Oqallinnermi oqaarseqarfiusinnaasumi peqataagit